1376/2022-2023

Khawzawl, the 27th July, 2022: Vawiin chawhma dar 11 khan Khawzawl District Level Coordination Committee on Fostering Climate Resilient Upland Farming System in the North-East (FOCUS) chu an Chairman Pu C.C. Lalchhuangkima, District Bawrhsap hovin DC Conference Hall-ah an thukhawm.

He hunah hian DAO Khawzawl Pu B.Ramnunsanga, District Project Manager (DPM) FOCUS ni bawk chuan Khawzawl District-a FOCUS project kaltlanga financial year 2019-2020 leh 2020-2021 a Agriculture, Horticulture, Soil leh A.H &Vety sector hnuaia hmalaknate, FOCUS thil tum leh kumin financial year 2022-2023 kal meka hmalakna leh hmachhawpte powerpoint presentation hmangin a sawifiah a. An department chan theuh atanga zawhna awmte FOCUS Technical Officer te'n an chhang bawk a ni.

FOCUS Khawzawl hnuaiah hian Circle pathum - Khawzawl, Khawhai leh Kawlkulh Circle-te a awm a. FOCUS hnuaia hamthatna hrang hrangte dawng thei tur hian kuthnathawktute chu Farmers Interest Group (FIG) member an ni tur a ni a, an duhna ber group; Jhum FIG (Tlangram lo nei pawl) , Landless FIG (VC ram theh ring pawl), Value Chain FIG (Sum chang thlai ching pawl), Community Conservation FIG (Ramngaw humhalh pawl), Wetland Rice Cultivatoin (WRC)/Terrace Rice Cultivatoon (TRC) FIG (Phai leh tlangram leilet nei pawl), Settled/Orchard FIG (Lo ram/Huan nghet nei pawl) ah te an awm thei a, hemi huang chhungah chauh hian hmalak thin a ni a. Tun dinhmunah FOCUS Khawzawlah hian FIG member mi 7000 an awm mek a ni.

FOCUS project kaltlanga hmalakna hrang hrang zingah tuidahkhawlna tanky siam te, tuihna humhalhna check dam siam te, leilet bial tlang venna streambank erosion control siam te, changkham logwood bunding siam, bench terrace siam, leihlet laih zau bakah dragon fruit zamna tur cement ban siam hnate khaw hrang hrangah kalpui a ni a. Thlaichi chi hrang hrang sem a nih bakah buhchi RCM 10 leh 13 sem a ni bawk a. Heng bakah hian balhla, lakhuihthei, thingfanghma, dragon fruit, coffee leh serthlum tiakte khaw tam takah sem chhuah a ni bawk.

FOCUS hian sik leh sa inthlak danglam lutuk tur veng chunga kuthnathawktute'n tlangram lo neih bansan si lova ngelghet zawka an tih changtlun (Jhum Improvement) theih nan hma a lak bakah, kuthnathawktuten eizawna mumal leh nghet zawk an neih a, an sum lakluh tih pun sak hi a tum bulpui ber pakhat a ni.

Meeting-ah hian District Level Coordination Committee on FOCUS member Agriculture, A.H&Vety, Horticulture, Soil, Rural Development, Forest, Revenue Department hotute leh District Joint VC Chairman-te an tel a ni.