No.1207/2020-2020

Vawiin chawhma khan Khawzawl District Level Task Force on COVID-19 chu Zaingen Community Hall-ah an Chairman, District Bawrhsap Pu H. Lianzela hovin an thukhawmin, inkharkhip thawh 4-na Khawzawl District-a kalpui dan tur an sawiho a; inkharkhip kal tawh a District Level Task Force leh Village Level Task Force te hmalakna hrang hrang thlir ho ni bawkin rawtna hrang hrang siam a ni.

Meeting-ah hian May ni 31 thleng Inkharkhip chhunzawm a nih leh dawn tâk avang leh Sawrkarin hemi atana inkaihhruaina a siamte sawiho a ni a. Harsatna hrang hrang awm thei leh a tih ziaawm dan tur te bakah Sawrkarin District Administration kuta a dah te pawh chipchiar taka sawiho a ni. Sawrkarin inkarkhipna hi a thlahdul hret angin lang mahse hrileng laka invenna lam uar taka kalpui chhunzawm a tul thute, kan him tlanna atana kan uar mek kut silfai, social distancing leh hmai tuamte chhunzawm zel tura mipui zirtir zel a pawimawh thute sawi ho a ni a. Sawrkarin inkaihhruaina a siam thar zulzuiin khapna thupek dinglai te a tul anga tidanglam a thupek thar chhuah nise tih a ni bawk.

Inkharkhip thawh thumna chhung khan Khawzawl District-ah state dang atanga lo haw khung hran mi 21 an awm a, an vai hian harsatna nei lovin Quarantine centre an chhuahsan tawh a ni. Inkharkhip thupek zawmlo pawisa chawitir mi 49 an awm a, hemi atanga pawisa tlingkhawm chu Rs. 4900 a tling a ni.

Tunah hian Khawzawl District-ah hian Quarantine Facility Centre hmun 19 ah a awm a, mi 388 an awm thei a ni. COVID-19 vei an awm thulha enkawlna tur isolation centre hi mi 6 awm theina-a awm mek bawk. Khunghran lai hi hmun 2 ah mi 22 an awm mek a, Tamil Nadu leh Assam atanga rawn hawte an ni. State dang atanga Khawzawl District chhunga rawn haw duh in report mek mi 212 an awm mek bawk.

Inkhunghran chungchanga inkaihhruaina thar inhrilhfiahna vawiin meeting-ah hian neih ni a. Quarantine Centre-ah hian ni 14 an awm hnuah harsatna neilo chu chhuahtir an nih tur thu te, mahni in lamah midang nena in awmpawlh lutuk lovin ni 14 dang chu fimkhur taka mahni inveng chunga an la awm tur thu te sawi a ni.

Khawzawl khaw pawn lama Quarantine Facility Centre-te enkawl leh ven dan turte uluk leh chipchiar taka sawiho a ni bawk a. Rawn haw tur hi la pung leh zel thei an nih avangin Quarantine Facility Centre tur engaw zat ngaihtuah belh a ni bawk.