No.698/2020-2021

Vawiin khan Khawzawl District Level Task Force on COVID-19 chu an chairman DC Pu H. Lianzela hovin an thukhawm.

Thutkhawmna ah hian Inkharkhip kalpui tawh china District chhunga hmalakna hrang hrangte thlirletna neiin, hmasawnna tur te leh kal zel dan turte chipchiar taka sawiho a ni a.

COVID-19 avanga inkharkhip a nih atang khan Khawzawl district chhungah mi 276 khunghran tawh niin, Sample test sak mi 6 an awm tawh bawk. Khunghrante hian hun ruat ni 14 hmang zo vek tawh in an chhuak vek tawh a, test tura sample 6 thawnte pawh an negative vek a ni.

VLTF 36 te tha takin an la duty zel a, heng zinga duty post 8 ah VLTF leh Police te inkawp in darkar 24 an vil mek a. Inkharkhip thupek bawhchhia mi 15 man an ni tawh bawk.

Sawrkar hmalakna a State danga tangkhang rawn haw tur tun dunhmunah mi 12 an nei mek a. Heng mite hi an lo thlen veleh medical team ten lo dawng sawngin anmahni khunghranna tura ruat DC Rest House-ah dahluh nghal nise tia rel a ni a. Quarantine Centre-a an luh hma leh an chhuahsan hma in Rapid Antibody Test hmanga COVID-19 an kai leh kai koh endik tur an ni.

Buh leh bal leh thlai ching uar tura mipui zirtirna chhunzawm zel nise tiin vawiin Khawzawl DC hova meeting chuan a rel a. Mipui kaihhruaina leaflet te siam a ni tawh bawk. Thlai chi dahkhawmna (seed bank) pawh tangkai taka hman mek niin, Ei leh bar tharchhuah kawnga hmasawnna thlen ngei tura hma lak nise an ti a. Hemi atan a bul leh thlai chin theihna hmun remchang dap in Bawnzawl, Kangbur leh Tiau zau te District Level Task Force chuan lo en tawh in, Agriculture link road chei that dan tur te pawh an en tawh bawk a ni.

Khawzawl wholesaler-te hnen atanga buhfai, alu, dal, sangha tin leh thildang an dawn chu Zonal Officer ten bial fan pahin a remchan dan angin sem darh se an ti bawk.

Tun dinhmunah VLTF te hna thawhdan chu lawmawm an ti a, dan hnuaiah zel khawng taka kal zel turin an ngen a ni.

Mipui nawlpuiah inkharkhip boruak a tlahniam ta deuhva hriatna a awm avangin mipuite zirtirna lamah tan lak thar leh ni se an ti a, hmaituam, kut sil leh midang nena inhlat te ngaih pawimawh chhunzawm zel nise an ti bawk.