No.696/2020-2021

Vawiin hian Pu Lalruatkima, Rural Development Minister leh Pu Lalrinsanga Ralte Serlui bialtu MLA chuan Vairengte Covid 19 screening point, North Chhimluang, Bilkhawthlir, Phaisen, Buhchangphai, Bukvannei, Saihapui K leh Rengtekawn te an tlawh.

Heng hmunah te hian thusawiin Pu Lalruatkima chuan, "Zoram himna atana dai theu a, hah taka duty-te inpekna a hmunah ka hmu ve duh hrim hrim a ka rawn kal a. In inpekna a ropui ka ti tak zet a ni," a ti a. Ram leh hnam humhalh tak tak tur chuan ramri tih hmasawn a ngai tiin chumi lam hawia ke pen an tum thu a sawi a ni.

Pu Lalruatkima chuan, "He hrileng dona kawngah hian mitinin kan mawhphurhna kan hneh hle a. Zoram lungthu pathum - Sorkar, Kohhran leh tlawmngai pawlte hi an hlu tak zet a, mipui te'n thu kan awihna te hi a ropui em em a. Kan local task force ang hi ram dangte hian nei ve se heti em em hian he natna hi an tuar na lovin ka ring hial a ni," a ti.

Rural Development Minister chuan thlai chi thlak hunlai a nih avanga theihtawpa hma la tura fuihin he hun harsa an tawh mek hi malsawmnaah chantir tum turin a sawm a. “Ei leh bara intodelh tura harh tharna kan chan hun, malsawmna hun, intodelhna tura tih tak zeta kan beih tanna hunah i hmang ang u. Thlai chi thlak uar ila, thlawhhma leh leipui siam uarin intodelhna hunah i hmang ang u," a ti.

Pu Lalrinsanga Ralte, Serlui bialtu MLA pawhin thusawiinSerlui bial hi he hri laka Zoram dai theutu an ni tih sawiin an inpeknaah lawmthu a hrilh a. Hun lo awm zel turah lungrual taka Zoram tana thawk zel turin a sawm a ni.

Minister hian Vairengte Task Force kutah cheng 20000/-, Golgotha Centre leh Hope Centre kutah cheng 10000/- ve ve a hlan a. Phaisen, Buhchangphai, Bukvannei, Saihapui K leh Rengtekawn Task Force te kutah sum fai a hlan bawk a ni. Pu Lalrinsanga Ralte MLA pawhin Vairengtea ramri ven nan drone a hlan bawk a ni.

Pu Lalruatkima Minister leh Pu Lalrinsanga Ralte MLA te hi Bilkhawthlir North Self Help Group chuan hmaituamna 300 ve ve mipuite tana sem tur an lo hlan ve bawk a ni.