No112/2021-2022

Dated Khawzawl, the 13th April, 2021: Nimin chawhnu dar 3:00 khan Khawzawl District Level Task Force on Covid-19 chu an Chairman Pu Zothanmawia hovin DC Conference Hall-ah an thukhawma, hmalak tawh dante thlirletin, Covid-19 hrileng dona kawnga hmalak zel dan tur an ngaihtuah a ni.

Nimina thukhawm chuan Mizoram sawrkar thuchhuak angin zan curfew chu khauh zawka kalpui nise tiin a rel a. Covid-19 hrileng a darh lohna tura sawrkarin inkaihhruaina a siamte kengkawha, khauh zawka duty turin veng/khua hrang hranga VLTF te bakah sawrkar hnathawk ruat nise tih a ni bawk.

Meeting-ah hian Khawzawl District chhunga Covid-19 vaccination dinhmun tarlan niin, tun thlenga Covid-19 vaccine la tawh zat chu mi 382 an ni a. Heng zinga mi 185 te chuan vaccine 2nd dose an la tawh tih tarlan a ni.

Khawzawl DLTF on Covid-19 chuan mipui punkhawmna lam chi reng reng; sakhaw biak inkhawm, games & sports, chhiatni thatni, sawrkar programme leh pawl anga punkhawmnaahte sawrkarin inkaihhruaina a siamte chu zawm a nih theih nan order chhuaha, order kengkawh tura hmalak zui zel nise tiin a rel a. Mizoram pawn atanga rawn lut khunghran ngaite dahna tur Community Quarantine Facility leh Covid-19 positive natna langchhuak lote enkawlna tur Covid Care Centre ruat nghal a ni bawk.