Hripui Novel Coronavirus Disease (Covid-19) laka Khawzawl District mipuite him theihna tura District Level Task Force on Covid-19 thukhawm chuan hetiang hian ruahmanna a siam a, mitinte chu zawm vek tura hriattirin a ngen nghal bawk a ni.
1. Sawrkar duhdan angin Covid-19 laka him theihna tura hmalatu tur Village Level Task Force (VLTF) chu Khawzawl District huamchhunga VC tinten a hnuai a mi ang hian an din theuh ang a, an hming leh Contact Number tarlanna report DC hnenah ni 24.3.2020 aia tlai lovah an thehlut tur a ni:-
1) Chairman : Village Council President
2) Vice Chairman : President, YMA Branch
3) Member Secretary : Village Council Secretary
4) Members:
i) Village Council Member atang mi pahnih (2)
ii) Branch YMA office Bearer atang mi Pahnih (2)
iii) President, MUP
iv) President, MHIP
v) Kohhran (Veng/khua chhunga Biak in nei chin) aiawh 1(pakhat) theuh.
vi) Medical Personnel (Doctor/Nurse/Health Worker/ASHA) 1 (Pakhat)
2. Thu leh awm hma chuan Khawzawl District huamchhungah VC tin ten Gram Sabha/Vantlang inkhawm koh rih loh tur a ni.
3. MGNREGS hnuaia hna kal mek leh hnathawh turah Programme Officer (BDO) te biakrawn hnuah chauh kalpui tur a ni a. Job-Card Beneficiary-te leh VC/VEC te indawrnaah a tam thei ang bera phone hman ni se, harsatna bik a awm a nih erawh chun VEC ten ruahmanna an siam ang.
4 Ram pawn/State pawn atanga lo haw reng rengte chu Village Level Task Force (VLTF) hnenah in report ngei ngei tur a ni a. VLFT ten Nodal Officer, District Level Task Force (DLFT) hnenah a rang thei ang berin an report thin ang.
5 District chhunga nitin mamawh zuartu ten chheprelh/manto uchuak taka hralh loh tur a ni a, a leitute pawn mahni chhungkua mamawh bak an chheprelhin an lei khawl tur a ni lo.
6. Khawzawl District-a Kohhran zawng zawngte chu an Kohhran inkhawm hrang hrangte tiam chin awm lova ti tawp tura ngen an ni a, Pathianni inkhawm bikah chuan Kohhran tinah inkhawm dar rik hun pangngaiah dar vuak ziah tho ni se, chumi hunah chuan chhungkaw tinin Pathian biakna hun hman theih ni se.
7. Hrileng boruakin ziaawm lam a pan hma chuan eng pawl leh tupawhin puipunna lam chi reng reng programme huaihawt loh ni se, a loh theih loh a kalkhawm a ngai a nih pawhin mi 20 aia tam punkhawm loh ni se.
8. Chhungkaw tinte tul bik thilah lo chuan pawn chhuah leh midang kawm/inlenpawh loh ni se, a tam thei ang ber mahni Inah inkhung tur a ni a. Inneih, lungphun, piancham, Jubilee lawm reng reng, thu leh awm hma chu chhung tinten buatsaih loh hram ni se, tul bik tak thilah lo chuan khawdang leh ramdangah zin loh ni bawk se.
9. District pawn atanga lokal sumdawng veivak thinte tih tawp vek tur a ni a, Khawzawl District atangin chhuahtir vek tur a ni.
10. Khawzawl Bazar pui -Vengthar Bazar, Zuchhip Bazar, Zaingen Bazar leh Dinthar Bazar te chu tun Inrinni Ni 21.3.2020 atanga khar a ni ang a, Sa/Chawhmeh zuar te’n an mahni veng theuhah an zuar ang. Veng chhunga an inzawrhnaah chuan an inkarah metre 3 aia tlem lo kar awl siam a ni ang a, VC ten lo enpui in ruahmanna an lo siam sak ang. Khawzawl khawpui ang tho hian a tuldan angina he ruahmanna hi khawdangah pawh kalpui tur a ni.
11. Online leh Cashless transaction kaltlang a bill pe tura mitinin tan lak ni se, hei hi a theih loh pawhin bill a khawma pek dan tur veng tina YMA, MHIP, KTP/TKP/PYD/SAY, etc. ten ruahmanna lo siam se.
12. Department Office tin in Office luhdawn Gate/Kawngkaah kut silna siam theuh tur a ni a, Dettol sahbawn leh Tissue Paper dah ni se, kut hrukna tur puan erawh chu dah tel loh ni se. Mipui dawrna/Bill pekna Office Counter a thu Staff zawng zawng ten face mask leh Glove vuah/bun vek tur a ni.
13. Khawzawl District huam chhunga Hotel leh Restaurant zawng zawngah kut silna mumal tak Dettol sahbawn leh Tissue Paper nen dah vek tur a ni.
14. Khawzawl District pawn atanga lo kal Sumo Driver te chuan an passenger te Khawzawl District-a chhuk turte chu Khawzawl District an rawn luh hma ngeiin Bio-Data an la zel anga, Report na form siam leh report-na hmun tur Police Department in an siamah an report ang.
15. India ram pawn atanga lokal Kuhva phur Motor-te chu National Highway nilo kan District chhung Motor kawng danga an tlan leh an thil phurh Khawzawl District chhunga an inhlanchhawn (transit) emaw hlan/hlanthlak (Loading/Unloading) emaw khap a ni a, Khawzawl District mipuite chu Kuhva phur Lirhei kaihhnawihah te inhlawh lo tura ngen an ni.
16. Thlan laih, Mitthi lumen leh a kaihhnawih dang chu VLFT kaihhruaina hnuaiah Branch YMA tin ten awmze nei takin hma an la ang.
17. Kohhran In tina sem tur COVID – 19 Awareness atana Leaftlet DLTF siam chu Kohhranin a semdarh hna an lo thawk ang a, VC tinin Tlangau hmangin Awareness ngawrh takin an kalpui bawk ang.
18. Inveng thei dinhmun a kan la ding hi Pathian hnena lawmthu sawiin he natna laka a venhimna dil ila, Sorkar leh khawtlang hruaitute, Kohhran hrang hrangte leh NGO ten Covid -19 laka invenna thuchhuah an siam te hi ngai pawimawh a, tha taka zawm theuh turin kan in ngen mawlh mawlh a ni.
