1736/2023-2024

Khawzawl, 1st September 2023: Vawiin khan Khawzawl District Lungphun Sub-Committee chu Khawzawl DC Conference Hall-ah an thu khawm a. Khawzawl Addl DC Pu Lalfakzuala chuan meeting hi a kaihruai a, Khawzawl District Lungphun hawn leh lawmna hun neih dan tur an sawiho a ni.

He hunah hian Khawzawl Addl DC Pu Lalfakzuala chuan Khawzawl District Lungphun chungchanga thutkhawm hmasa July ni 21, 2023 a neihin hma la tura a ruat Sub-Committee hmalakna hrang hrang te tarlangin, lungphun awmna tur Khawzawl DC Office Building thar pawh hawn theih a peihfel a nih tep tawh thu a sawi a. Sub-Committee member Pu B. Vanlalbiakzara pawhin Lungphun buatsaihna kawnga an thlen chin leh hmabak te he hunah hian a sawi bawk a ni.

Khawzawl District Lungphun hi Khawzawl Dinthar Venga DC Office Building thar kawtah a ding dawn a. Harsatna dang a awm lo a nih chuan September thla chawhnu lam khian bialtu MLA, Deputy Chief Minister Pu Tawnluia hovin ropui leh kokim taka hawn tum a ni.