1737/2023-2024

Lunglei the 1st, September' 2023: Vawiin khan DC Conference Hall, Lunglei ah Lunglei District Disaster Management Authority (DDMA) chu Pi Ramdinliani, IAS, Deputy Commissioner leh Chairperson District Disaster Management Authority nibawk kaihhruaiin kumin fur ruahtui tlak tam avanga chhiatna thlengte thlirletna leh leimin leh leimin tamna hmun tihziawmna leh tihngheh dan tur te sawi hovin meeting neih a ni.

DDMA meeting ah hian Tourist Lodge Zotlang, panna kawng lei tlakhniamna hmun chungchang Zotlang Local Council Chairman hnen atangin ngaihthlak niin he lai hmun hi Geology & Mining mithiam ten lei tlakhniam chhan leh  leilung te zirchiang tura tih a ni a, Tourist Lodge panna kawngah motor a luhtheih loh avangin approach road siam dan tur PWD in an enfel bakah lei tlahniamin  ATL road  a hnawhte paihdan tur ngaihtuah tura tih a ni bawk. He lai hmun a inhmun neite zawnchhuah leh hmun him lova puan nise tihsawihona neih anih bakah he lai hmunah hian tunhma in tuikhur pahnih awm thin chu tha taka tuaihnum leh nise tih rel a ni. Zobawk South NH 54 leimin na lai hi lirthei veivak khaihlak lova a tlan theih nan NHIDCL in thenfai hna thawk tura tih a ni a, leiminna zawna cheng chhungkua pali inthiarchhuak te chu Disaster Management & Rehabilitation Department atangin chhawmdawlna pek tur tih niin Pukpui leh Tlawng inkar kawng leimin leh khuar lai te PWD in hma an lak mek thu tarlan a ni bawk. Lunglei veng thenkhat ah thingtlu mai thei in leh mihring tana hlauawmte chu DDMA in kih phalna pek a ni. NHIDCL in Lunglei to Tlabung kawng NH 302 hma an lak mek dan sawiin Pu Zonunmawia SDO (C) Tlabung in Tlabung tui lian in a Tlabung leh a chhehvel khua a in leh lo, buh leh bal, huan, sangha dil tihchhiat dan leh hmalakdan te a sawi bawk a ni. Tuilian kamin hmun thenkhatah tuitling a siam a, heng hmunah hian thosi a ti punga, natna a pun loh dan ngaihtuah sak turin a thlen bawk a ni.