417/2024-2025

Khawzawl, 6th May 2024: Vawiin khan Khawzawl District Narco Coordination Center (NCORD) chu an Chairman, Khawzawl Bawrhsap Pu K. Lalrohlua hovin an thu khawm a. Ruihhlo tirem tura NCORD hmalak tawhna hrang hrang te an thlir ho a, hmalak zel dan tur te an sawi ho bawk a ni.

Pu K. Lalrohlua chuan he hunah hian Khawzawl District chu ramri (International Border) hrula awm a nih angin, ruihhlo tawlh rukna kalkawng a nihna chen a awm a ni, a ti a. Hei vang hian Khawzawl District chhungah ruihtheihthil a hluar phah ni a a hriat thu a sawi bawk. Bawrhsap hian ruihhlo la ti ve lo te venhim chu ngaihpawimawh hmasakah neih a ngai tih sawiin; sawrkar, khawtlang, kohhran leh tlawmngai pawl te chu an thlen chin theuhah ruihhlo tih chhin loh pawimawh zia uar taka zirtir zel turin a ngen nghal a ni.

He huna thusawitu dang Khawzawl SP Pu Lalchhuanthanga chuan Khawzawl District Education Office (DEO) te nen inrawnin, tun Financial Year (2023-24) chhunga hmalak dan tur ‘Campaign Calendar’ an ruahman fel tawh tih a tarlang a. NCORD meeting-in District Executive Force te kuta mawhphurhna a pekah tlanchhiat an tum loh thu sawiin, uar zawka ruihhlo la ti ve lo te zirtirna neih chu ngaihpawimawh a tul thu a sawi bawk.

Pu R. Vanlalzawma, Dy. SP (Hqrs) chuan he hunah hian NCORD thutkhawm hmasa thurel bawhzuia Awareness Campaign neih tawh dan report a pe a. April ni 21 khan Kawnzar Presbyterian Kohhran Naupang Chawhnu inkhawmah Awareness Campaign neih a nih thu leh April ni 29 khan sikul naupang te pualin Ngaizawlah neih a nih thu a tarlang a. Cod Nerc hmalaknain Tualteah Awareness Campaign neih a nih thu a tarlang bawk.

Vawiin thutkhawm hian Khawzawl District-a ruihhlo do zel dan tur uluk takin an rel a. An thurel zingah hian Kohhran tin te hnenah ruihhlo that loh zia sawi uar tura ngen te, Awarness Campaign huapzau zawk neih chhoh zel te a tel a ni.

NCORD meeting hi thla tin neih thin a ni a, hmalaknate hi Narcotics Control Bureau (NCB) lamah report zel thin a ni. Vawiin meeting-ah hian Khawzawl District Hospital aiawh, Districtv Child Protection Office aiawh, Education aiawh leh tlawmngai pawl hruaitute an tel a ni.