2599/2022-2023
Khawzawl, the 10th November, 2022: Khawzawl District Sports Committee dinfel a nih hnua thutkhawm hmasa ber chu vawiin chawhma dar 11 khan an Chairman Pu C.C. Lalchhuangkima, District Bawrhsap kaihhruaiin DC Conference Hall-ah neih a ni.

Khawzawl District Sports Committee Chairman Pu C.C. Lalchhuangkima chuan District Sports Committee thutkhawm hmasa ber neih a ni thei chu lawmawm a tih thu a sawi a. Sports Association hrang hrangte chu thawhhona tha tak nena lungrual taka sports tihhmasawn zel kawnga thalaite tiphurtu nih tum turin a fuih a ni.

He hunah hian Sports Association hrang hrang atangtein mamawh an neihte ngaihthlak a ni a. District Sports Committee chuan District chhunga Sports Association 19 te hnenah an mamawhna zawn leh a tul apianga hman turin Rs 5,000 theuh pek ni se an ti a. Zonet buatsaih Fight Night-a tel tur boxer 7 leh anmahni hruaitu tur mi 3 te kalna leh ei leh in senso tum pui ni se an ti bawk.

Heng bakah hian Khawzawl District-ah Sports-in hma a sawn zel theih nana hmalak dan tur pawimawh hrang hrangte zau takin an sawiho bawk a ni.