2600/2022-2023
Aizawl the 10th November 2022 : Nimin ni 09/11/2022 dar 11:30 khan Aizawl SP Conference Hall-ah tun Krismas leh kumthar lo thleng tur ah Sound System leh Noise Pollution chungchang sawihona neih ani a. Kohhran aiawh, Local Council, community leh NGOs hrang hrang te chu Aizawl District Bawrhsap Dr.Lalhriatzuali Ralte, IAS leh Superintendent of Police Pu. C.Lalruaia hovin an thu khawm.  

He hunah hian Kohhran leh NGOs hrang hrang te an ngaihdan lak ania. Ri bengchheng chi hrang hrang halpuah hal te, karaoke leh a chhehvela bengchheng leh zan tlaia bike (proton) ri bengchheng te chu mipui tan hnawksak anih thu leh damlo, naupang leh kum upa tawh tana hriselna khawih pawi thei anih tel bawk avangin tun aia tha zawka khap theih nise tihte an sawi ani.

District Bawrhsap leh Superintentent of Police (SP) te pawhin thusawiin, the Noise Pollution (Regulation and Control) Rules, 2000 chuan residential area bik ah zan lamah phei chuan 45 db aia ri bengchheng a phal loh thu te. Zan dar 10 hnu ah events neih dawnin phalna lak a ngaih thu te an sawi bawk ani.

Chumi piah lamah, mipui thlawpna an mamawh thu leh Kohhran leh NGOs hrang hrang te pawh in an member theuh te tun hunpui lo thleng turah Sorkar thuchuak te tha taka zawm tura hmalakpui turin an ngen nghal a ni. Chuan, zan tlaiah ri bengchheng siam thin an awm chuan, authorities hnenah report thin turin an ngen nghal bawk ani.

He hunah hian MPCB aiawih pawhin thu sawiin, Mizoram in a ri bengchheng chungchanga dan kan zawm loh ber te zing ami chu Public Address System (vengchhung information mike) hman chungchang anih thu a sawia. Dan chuan mahni inchhung leh closed door a bengchen chu a khap lem lova, mahse ri bengchheng pawn lama a chhuah hi a khap ani a ti bawk.

Chuan Pawl hrang hrang kal khawm ten hetiang sawiho na hun sorkar lam hotuten an buatsaih hi lawmawm an tih thu leh rahtha a chhuah ngei an beisei thu leh an ni pawhin an member-te a theih ang ang an hrilhhriat tur thu pawh an sawi nghal bawk a ni.