3487/2022-2023

Aizawl 6th February 2023: Vawiin khan Joint YMA Hall, Aizawla programme buatsaihah Formosa Foundation India chuan Khawzawl District huamchhunga branch YMA 28 hnenah Oxygen Concentrator an pe a, District Hospital Khawzawl hnenah Mobile Ventilator an hlan bawk. He hunah hian Deputy Chief Minister Pu Tawnluia, Tuichang bialtu MLA chu khuallian a ni.

Pu Tawnluia chuan ram hmasawnna leh mipuite tana rawngbawltu sawrkar ni lo, pawl lian tak tak an awm a, khawtlang leh mipui rawngbawlna kawngah thahnemngai takin an penchhuak thin a, chutiang rawngbawlna kalpuitu Formosa Foundation India ten thla an rawn zarna leh luanchhuahnaah Khawzawl District mipuite a chhawr tangkaitu an ni chu a lawmawm takzet a ni, a ti. Oxygen Concentrator leh ventilator te hi mipuite tana tangkai leh mamawh, natna khirh tak tak tuarte nun chhanhim theitu a ni a, man to tham tak te a nih avangin awlsam taka lei a harsa a, Tuichang bial chhung khaw hrang hrang ten a thlawna an dawng thei hi a lawmawm hle, Pu Tawnluia chuan a ti a. Political party leh kohhran thliar lovin, mipui mimir luankhawmna leh funkim bertu YMA hminga pek an ni pawh hi a inhmeh hle a ni, a ti bawk. Deputy Chief Minister chuan Formosa Foundation hmalakna fakin COVID hunlai atang tawhin mipui rawngbawlnaah nasa takin ke an pen a, an hnathawh rah kan seng chho zel hi a lawmawm a ni, a ti a. Oxygen Concentrator an dawn tak te uluk taka enkawl zui a, tuaihnum leh duat tura chahin a chhiatlohna atana enkawl that chu YMA te kutah a awm ve thung tawh dawn a ni, a ti.

Deputy Chief Minister Pu Tawnluia chuan faina leh thianghlimna kawngah a bial mipuiten hma an sawn a, UD&PA in Mizoram chhunga khawpui zawng zawngte huapa inelna a buatsaihah pawh Tuichang bial ten an titha hle tih a sawi a. Hriselna leh thianghlimna hi a inzawm tlat avangin hemi kawngah hian hmasawn zel turin mipuite he hunah hian a sawm bawk a ni.

Programme hi Formosa Foundation India Coordinator Pu Vanlalruata Ralte chuan a kaihruai a. Formosa Foundation India Chairman Pu Jonathan Lalremruata, Khawzawl sub-headquarters YMA President Pu K.Lalnunsanga leh Khawzawl District Medical Officer Dr Albert Lalhminghlua ten thu an sawi a. Khawzawl DC Pu CC Lalchuangkima’n lawmthu sawiin hun hnung a khar a ni.