3486/2022-2023

Aizawl 6th February 2023: Vawiin khan Vanapa Hall-ah kangmei laka fimkhur inzirtirna kawng pakhat, kumtina kalpui thin 'Fire Prevention Week’ chu Home Minister Pu Lalchamliana'n hawngin khuallian a ni a. EF&CC Minister Pu T.J Lalnuntluanga chu khualzahawm a ni.

Khuallian Pu Lalchamliana chuan kum 20 chuang kalta khan Forest Department ah a tel ve thin thu sawiin thawhpui tam tak vawiin ni ah awm tawh lo mah se, upa in sahuai chu sahuaiin a thlak an tih angin thawktu fel leh Minister viak tha tak hnuaiah Forest Department in hma a sawn zel a ni a ti a. Khuallian chuan mei chu mihring te dam khawchhuahnan tangkai em em ni mah se, fimkhur loh chuan mihring te tana thil pawi thei thlentu a ni a ti a. Mei thunun loh chuan In kang leh ram kang a siam thin a ni tih vawiin niah hian zoram mipuiten hre thar leh ila, Mizoram-ah lo neih hmanga eizawnna nei a tam zawk kan nih avangin lo kan vat a, ramngaw a kan kai loh nan, meikawng siam a ni thin a, meikawng tha taka sial a nih chuan ram vah bak a kang lo nge nge thin a ni a ti a. Meikawng vil that loh avangin ramngaw tam tak kan chan a, sawrkar danin a phal loh sapel thin ten ramsa eitur hnah chawr a lo awm theih nana ram an hal thin te hian ramngaw ti chereu nasa bawk a ni a ti a. Rama chawhmeh zawng, chakai chhi leh thildang ti ten hnahthel ro zinga meizial zuk bung tihhlum loh a an paih thin te hian ram a tihkan fo thin avangin fimkhur lehzual turin zoram mipuite a chah a. Ramkang veng tura tha leh ngaihtuahna sengtu mipui, nu leh pa, YMA member te bakah naupang tleirawl te chungah lawmthu sawiin an thahnem ngaihna avangin hmun thenkhatah ramkang telh a ni fo a ni a ti. Mizoram lo hi ramdang zofate hian kan nei lo a, kan ram neih chhun Mizoram hi kan humhalh a kan humhim tlat a pawimawh a, ramkang nghawng thenkhat te chu ram a tibuai a, tuihna a titlem a, a kum leh a lo neih tur a tichhia a, hmun thenkhatah khua te kangin channa ropui tak a thleng thin a ni tih hria a, kan thanharh tawh hi a hun takzet a ni a ti a.Ramngaw kan neih te hi mau hmun a ni emaw thing hmun a ni emaw kan rohlu a ni tih hi kan hriat a, chumi humhim tur chuan kan ngaihtuahna kan tha leh zung kan hmang theuh tur a ni a ti a. Ram kang chhuak veng tur hian Forest a thawk mi 600 chuan an veng seng dawn lo a, chuvangin khawtina mipui kan tan tlang a, ramkang leh in lama kang mei chhuak hi kan ven theuh a, fimkhurna inzirtir thar leh ila, kan awmna hmun theuhah, ramngaw leh in kang thleng lo tura kan mawhphurhna theuhte hlen chhuak thei turin zoram mipuite a chah a. Vawiin Thupui- 'Thapui Thawhin Kangmei I Veng ang u' tih hmang hian kumin Fire Prevention Week, 2023 chu lawm takin Khuallian Pu Lalchamliana chuan a hawng a ni.

Khualzahawm Pu T.J Lalnuntluanga pawhin thu sawiin thawktu te chungah lawmthu a sawi a. Fire Prevention Week hi kum 2000 atanga khan hmangin kum 23 na a lo ni chho der mai a, NGO hrang hrang, khawtlang, mipui, kohhran thlenga kan thawhhona vangin kangmei dona kawngah hma kan sawn zel a ni a ti a. Eizawnnaa kan neih Jhum Cultivation chu a thlakna tur huan nghet neih chu sawrkarin a kalpui mek thu sawiin, Green India Mission chu Mizoramah division panga a huam mek thu a sawi a. Green India Mission hian District tin a huam theih nan hmalak mek zel a ni a ti a. Agroforestry hmanga huan nghet neitute an pung zel chuan ram Kang duai duai thin chu a reh hret hret a beisei thu a sawi a. ICIMOD te nen tangkawpin Mamit ah Coffee chin a nih thu te, hmun thenkhatah sapthei chin kalpuiin hlawhtlinna a awm tawh thu a tarlang bawk a ni. Kan ram hmasawnna kan kalpui mek zingah sik leh sa inthlak danglam nasa avanga tui hna kam hret hret ven nan lui kawr leh lui dung a thing leh mau venhim leh humhim kawngah deparment chuan JICA te nen tangkawpin project a kalpui mek a ni a ti a. Khawpui chhung ram ngaw siam nan Nagar Van chu district leh town a puan zawng zawngah kalpui a nih mek thu a tarlang bawk a ni. Khualzahawm chuan ramngaw venhim kawngah sawkar leh mipuite tanrual a pawimawh em em a, thunun loh kang mei chhuak veng turin zoram mipuite a sawm a ni.

Pu RS Sinha, Addl. PCCF chuan kalkhawmte lawmin, Department aiawhin Pu RK Singh, PCCF chuan thutawi a sawi a. Pu Laltlanhlua, DFO Aizawl hnen atangin Ramkangin ram a tihchhiat dan chungchang ngaihthlak a ni a. He huna kalkhawmte hian Fire Prevention Week denchhenin thutiam (pledge) sawi rualna hun an nei a. Pi Kamal Preet, Addl. PCCF chuan lawmthu sawiin he hun hi a khar a ni.