2765/2023-2024

Khawzawl, 9th November 2023: Vawiin khan Khawzawl District Water and Sanitation Mission Committee chu an chairman Pu K. Lalrohlua, Khawzawl DC hovin an thu khawm a. Khawzawl District chhunga khaw tin ODF Plus Model  Village a hlankai thuai an nih dan tur leh Jal Jeevan Mission a hmalak chhunzawm zel dan tur an sawi ho.

Khawzawl DC Office Chamber-a thutkhawm neihah hian District Water and Sanitation Mission Committee (DWSM) Member Secretary Pu Liantluanga Chohte, EE PHED chuan  Open Defecation Free Plus (ODF Plus) awmzia sawifiahin Swachchh Bharat Mission - Gramin Phase II hnuaia mi a nih thu a sawi a. ODF Plus chuan India ram pumpuia pawnler a inthiar an awm tawh lohna vawn nun chu a tum ber a ni, a ti. Khawzawl District chhunga thingtlang khua 25 zinga khaw 24 chu ODF Plus Village an ni tawh thu tarlangin, ODF Plus Village la ni ve lo Neihdawn khua pawh Integrated Management Information System (IMIS) a la upload fel an nih loh vang chauh a ni, a ti. ODF Plus Village te a hmuna enfiah tur hian DWSMC member-te hi team hnihah then an ni a; November thla chhung nge hian verification hi neih fel a, Mamit District dawta ODF Plus Model District hmasa ber nih thuai tum a nih thu meeting-ah hian tarlan a ni.

Jal Jeevan Mission hnuaia In tina tui pek (Har Ghar Jal’ chu khaw 21 ah pek fel tawh niin, khaw 4 ah pek theih thuai beisei a nih thu meeting-ah hian tarlan a ni a. Har Ghar Jal la zawh fel lohna khua pali - Kawlkulh, Vanchengpui, Chhawrtui leh Riangtleiah te hian December ni 15 hmain pek fel tum ni se tiin meeting hian a rel bawk.

Meeting-ah hian Khawzawl DC Pu K. Lalrohlua , PHED EE Pu Liantluanga Chohte, DAO Pu Vanlalruata, SDO (PHED) Pu Eliza Vanlalpeka leh member dangte an tel.