129/2026-2027

Dated Khawzawl, the 11th April, 2026 : Vawiin khan Khawzawl Zaingen YMA Hall-ah Khawzawl District Wrestling hawnna neih a ni a. Pu R. Lalrinhlua, Sub Deputy Commissioner leh District Sports & Youth Officer (DSYO) leh Khawzawl District Sports Committee Secretary ni bawk chu khuallian a ni a, MWA President Pu Ngurthansanga chuan Khawzawl District Wrestling Association hawnna a nei bawk.

Khuallian Pu R. Lalrinhlua chuan thu sawiin, Khawzawl District Wrestling Association din a ni ta chu lawmawm tiin duhsakna sang ber a hlan thu a sawi a. Infiamna sports-in a ken tel chu ei leh ina fimkhur a ni a. Infiammi hlawhtling chu zu leh ruihhlo lakah a fihlim thin, a ti a. ⁠Infiamna hi mihring taksa tan a tha a, infiamnain a ken tel tlat chu ngawrh taka taksa sawizawi hi a ni a. Eng infiamna pawh hi regular exercise ngai veka, taksa kan sawizawi hi kan taksa hian a lo ngeih hle a. Sports infiamna hian taksa, rilru leh ngaihtuahna thlengin hriselna a thlen a, hei vang hian mihring te hriselna atan hian infiamna hi damdawi tha ber a ni, a ti bawk a. Khawzawl District chhungah Sports Association hrang hrang 17 vel a awm a, Annual Program duante hmangin chhawmdawlna dawn thin ani, a ti bawk.

Khawzawl District Wrestling Association hawngtu, MWA President Ngurthansanga pawhin thu sawiin Mizoram Wrestling Association (MWA) leh Khawzawl District-ten ni chhinchhiahthlak a nei chu lawmawm a tih thu a sawi a. Wrestling hi Mizoram States Sports Council hnuaiah dan anga inziak lut Association upa pawl tak ni tawhin, Wrestling Federation of India-ah pawh affiliation nei kan ni a. Wrestler tha leh ti peihte tan Olympic thlenga kalkawng mumal tak neisa vek a ni, a ti.

Mizoramah pawh District hrang hrangah inzarpharhin District tinah hian Club tha tak tak engemawzat din an ni bawk a. Chung atang chuan kumtin State chhungah championship chi hrang hrang kan nei thinin, chung atanga a ti thate chu National khel turin kan intir liam thin a ti.

MWA President chuan, hruaitute kan ni emaw, Wresler kan ni emaw, taksa ti chhetu, chhungkaw tibuai a, ram leh hnam ti mualpho thintu Ruihhlo laka fihlim ang u. a Ruihtheih thil nen chuan thui kan kal thei dawnlo tih i hrethar ang u, a ti bawk.

Report petu, MWA General Secretary Lalrochhuanga Colney chuan, Mizoramah Wrestling Association pariat a awm tawh tih sawiin, MWA danpui chi hrang hrang 24 hnuaia inrelbawl a nih thu a sawi a. Indian mite Bana kaih, Empowering Mizoram Sports hnuaiah Coach dil thuai turin a ti a. Kum 2036-a India ramin Olympic Games a thlen tumah hmabak phurawm tak kan neih thu a sawi.

Khawzawl District Wrestling Association hawnna inkhawm hi KDWA President Pu R. Lalhunmawia chuan kaihruaiin, MWA Vice President Pu Vanlalruata chuan lawmthu sawina a nei a ni.