128/2026-2027
Champhai, dated 11th April 2026 : Vawiin khan Pu Vanlalhlana, PWD Minister chuan Champhai, Mualkawi, Melbuk leh Zokhawthar inkalpawhna kawng siamthat tur a hmunah kalin a enfiah a, PWD Department hotu E-In-C, Chief Engineer-te leh Technical Officer-ten an tawiawm a ni.
Highway kawnghluiin a paltlang siam thatna tur One Time Improvement (OTI) atan hian Nuaih 985 (₹985 lakhs) sanction a ni a. He hna hian Champhai khawchhung Kanan Veng atanga New Champhai Zotlang inkar bakah Mualkawi, Melbuk, leh Zokhawthar khawchhung kawngte a huam dawn a ni. He kawng, a tira Km 17.45-a thui hi Black top chhah tha tak (BC=40mm) hmanga siam tur a ni a, tunah hian Tender buaipui mek a ni.
Hemi bakah hian, Khankawn atanga Zokhawthar inkar, 2-lane highway awmsa enkawl zui (Performance Based Maintenance Contract - PBMC) hna thawhna tur hian Nuaih 2,895 (₹2,895 lakhs) sanction a ni bawk. He hna atan hian Tender chhuah tawh niin, tun thla ni 30 hian Technical Bid hawn a ni ang. He hnathawh tur hian kawng chhe lai hnawh phui (Initial rectification), Road sign leh Protection wall siam, leh kawng tluana Blacktop thar (Periodic Maintenance) te a huam a ni.
He hmalakna hnuaiah hian kawng siam bakah kum 5 chhung enkawl zui (Routine Maintenance) hna leh leimin thenfai (Emergency works) hnate pawh a tel vek dawn a. He hmalakna hian Champhai leh Zokhawthar inkar inkalpawhna a ti hmasawn hle tura beisei a ni.
