Nimin chawhnu dar 3 khan Government Khawzawl College-ah Champhai District Bawrhsap Pu Vanlalngaihsaka, IAS hovin District thuneitute leh Khawzawl Hermon veng leh Electric veng khawtlang hruaitute chuan VC inthlan hnuhnung bera inthlang ve thei lo, Khawzawl Electric venga VC inthlan buatsaih thuai a nih theih nan harsatna awm mekte sutkian dan tur ngaihtuahin meeting an nei a, Khawzawl Hermon veng leh Electric veng VC-te chu dawhkan khat kila an veng huam chin turah inremna siam tur leh an inremna chu Champhai DC Office-a thehlut tura tih an ni.

Meeting kaihruaitu Champhai District Bawrhsap Pu Vanlalngaihsaka, IAS chuan Khawzawl Electric vengin VC inthlan an neih thuai theihna tura ngaihtuahna seng tur leh chumi kawnga hmasawnna kalmek tithuanawp zawnga hmala lo tura member-te chu ngenin, “Kan ngaihdan leh duhdan zawng zawng tihhlawhtlin chu hmasawnna daltu a ni thei tih I hre thar ang u,” a ti a. Champhai District DLAO Pi V. Lalmuanpuii hnen atangin harsatna awm mek leh hmalakna kalpuidan report ngaihthlak a ni bawk.

Mipui hmakhua ngaia sawrkarin Khawzawl Electric venga VC Election kalpui a tum chu State Election Commission chuan Electric veng huam chin tihchiang hmasa zet tura a tih avanginhe hmalakna hi kalpui a ni a. Hetih lai hian Hermon vengin kum 1987-a sawrkar notification behchhana an veng huam chin tura an ngaih leh Electric vengin an veng huam chin tura an ruahman chinah inhriatthiam lohna a awm avangin Meeting chuan veng pahnih hruaitute chu dawhkan khat kila an veng huam chin tur mipuite hmakhua ngai chunga chingfel thuai turin a ngen a ni. Khawzawl hi kum 1987 thleng khan VC pakhat hnuaiah a awm a.

Kum 1987 khan VC pali – Khawzawl Vengchhak, Khawzawl Vengthlang, Khawzawl Darngawn leh Khawzawl Hermon ah te then a niin ramri huam chin tih chian nghal a ni a. VC palite hi kum 1990 khan VC pakhatah suihfin leh vek niin kum 2006 atang khan VC eng emawt zatah thensawm leh niin tunah hian Khawzawlah hian VC pariat an awm mek a ni.