Nimin chawhma dar 11 khan Champhai District KVK chuan Chalrang leh New Chalrang khuaa sawhthing chingtute tan sawhthing tam tur ven dan leh a enkawl dan zirtirna a buatsaih a, sawhthing chingtute hnenah hian sawhthing tam tur venna damdawi a thlawnin sem nghal a ni. Sawhthing chingtu mi 63 te tana an hmunhma ngei a zirtirna, Farmers Field School on Ginger hi Champhai District KVK atangin Pi Lalrinawmi Ralte, Senior Scientist & Head leh Pi Malsawmkimi, Scientist (Horti) bakah DI&PRO Pu Neng Thianlala, MIS ten an hmanpui a ni.

Nimina Chalranga Farmers Field School on Ginger hi Champhai District KVK-a Senior Scientist & Head, Pi Lalrinawmi Ralte in a kaihruai a, sawhthing chingtu kalkhawmte chu an sawhthingte uluk taka enkawl tura chahin, “A nat hnua enkawl chu a tlai tawh thin avangin a hun taka sawhthing natna hriatchhuah a pawimawh hle a ni, a ti a. KVK mithiamte tawiawmtu, Pu Neng Thianlala, DIPRO pawhin sawhthing tam tur ven that a tul zia sawiin sawhthing chingtu kalkhawmte chu an thil zirte midangte zirtir chhawng zel turin a chah bawk.

Pi Malsawmkimi, Scientist (Horti) chuan hlawhtling taka sawhthing chin dan tur chipchiar takin loneitute chu entirna nen a zirtir a. Sawhthing chinna hmun tur leh a chi thlan uluk chu hlawhtlinna bul a nih thu sawiin Pi Malsawmi chuan sawhthing leh buh, bean lam chi, bekang leh vaimim te chin pawlh a that viau lai in bawkbawn leh hmarcha nena chinpawlh a erawh chuan sawhthing tan natna a thlen awlsawm thu a sawi a. Leitha hman tur dik taka chhut hian tul loa sum sen a tihtlem thu sawiin lo len zawng (area) azira leitha hman zat tur chhutdan tur a zirtir bawk. Sawhthing natna tlanglawnte leh a hriatchhuah awlsam dante leh a enkawl dan sawhthing chingtute chu entirna hmangin a zirtir bawk.

Sawhthing chingtute hi theory class neihpui an nih hnuah sawhthing chinna hmun lote tlawhin KVK mithiamten chuan sawhthing enkawl dan a takin an zirtir leh a ni.