Vawiin khan Aizawl East-II bialtu MLA, Finance Minister Pu Lalsawta leh Urban Development and Poverty Alleviation (UD&PA) Minister Pu Zodintluanga chuan Dawrpui Veng tlawhin Hnamro building-ah khawtlang hruaitute nen inkawmhona hun an neih hnuah veng chhunga sawrkar hmalakna hrang hrang an tlawh.
Pu Lalsawta chuan sawrkar hmalakna thar New Economic Development Policy (NEDP) hmangin Mizoramin bung thar a kai dawn a ni, a ti a. He policy thar hmang hian mi tumruh leh teirei peih, lehkhathiam leh a ngaihna hriate tan kawng hawnsakin thlai, buh leh bal thar chhuah leh ranvulh te hi sumdawnna hlawhtling, hausakpui tham eizawnna tlak a nih zia lantir an tum thu a sawi a ni. Aizawl East-II bialtu MLA Pu Lalsawta chuan Dawrpui veng chhunga sawrkar hmalaknate tarlangin vantlang mipui chhawr tangkai mek hmasawnna ruhrel engemawzat din tawh niin chhunzawm zel a ni ang, a ti a. Aizawl khawpuiin smart city ni tura kawng a zawhnaah pawh Dawrpui veng chu a chhawr tangkai ber tur te zingah a tel a ni, a ti.
Pu Zodintluanga pawhin thu sawiin ram hmasawnna hna thawk tura mipuiin an thlan chhan ang ngeiin sawrkar dinglai chuan theih tawp a chhuah a, Dawrpui veng chhungah ringawt pawh hmuh theihin hmasawnna hna tam tak thawh a ni, a ti a. Dawrpui area chhung Zodin cinema hall hluiah Mizoram tana landmark pawimawh tak ni tur Multi Level Car Parking cum Multi Utility Centre din a nih tur thu leh Aizawl Civil Hospital bul Jail veng panna kawngpui ti zauva transformer hlui tawh tak sawn chhuakin turning point zau zawk siam tuma hmalak mek a nih thu a sawi a ni.
Minister pahnihte hian MLA fund leh UD&PA sum hmanga sak Jubilee Hall an tlawh a. He hall ah hian tlawmngai pawl hrang hrang leh Local Council te’n office an nei a. Vantlang inthiarna leh inbualna thianghlim tak a awm bawk. Hemi zawh hian Dawrpui Mulitipurpose Centre tlawhin an hnathawh dan a hmunah an en a. Dawrpui khatlang hian he centre sakna tura ram an neih tawhsa atang hian Aizawl Civil Hospital Trauma Centre sakna tur hmun an pe a ni.
Dawrpui khawtlang hruaitute hmalaknain Zion Street chhukthlaa mimal sumdawng ten vantlang kalkawng an luah thin chu tun hnai lawk atang khan an khap ta a. Bazarpui tawt lutuk tiziawmin mipui tan awlsamna nasa tak a siam a ni. Minister pahnihte hian helai hmun hi tlawhin tuihawk luankawr siam dan turte an en nghal a ni.
