Vawiin (July ni 22) chawhma dar 11 khan Lawngtlai DC Conference Hall-ah Additional DC Pu R.Lalsangluaia hovin Lawngtlaia Independence Day 2016 hman dan tur rel a ni a. Sawrkar department, zirna in leh NGO hrang hrang aiawhte an tel a ni.

Meeting chuan kumin Independence Day lawmna hi CYLA Playground-ah chawhma dar 10:30-ah hman ni se, tiin a rel a. Kum dang ang bawkin parade contingent – armed, unarmed, school leh band party hrang hrang atanga nei lehin, endiktu leh a ti thate hnenah lawmman sem leh ni se, tih a ni a. Lawngtlai District chhunga mi mal thisen pe tam, vawi 20 chuang pe chin leh nikum I-Day leh kumin I-Day inkara pawl hminga thisen pe tam ber hnenah lawm thu sawina pek ni se, tih a ni bawk.

Independence Day lawm tura thil pawimawh hrang hrang sawi ho niin, department leh tlawmngai pawl hrang hrangte hnenah mawhphurhna sem rual a ni a. A ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni.

He'ng bakah hian Independence Day lawmna puala football tournament buatsaih rem tih a ni a. Chhawmdawlna in thlan bikte hnenah tanpuina thilpek pek ni se, tih a ni bawk.