1533/2023-2024

Khawzawl, 16th August 2023: Vawiin khan KVK Khawzawl District chuan Khawhai VC House-ah ‘Farmers Scientist Interaction’ an buatsaih. He hun hi Dr. Malsawmkimi Senior Scientist & Head, Khawzawl KVK chuan kaihruaiin kuthnathawktu mi 70 an kalkhawm.

KVK thawktute leh kuthnathawktute hian sawihona hun hlawkthlak tak hmangin Tomato chin kawnga harsatna hrang hrang white fly, Leaf curl virus leh Tomato rah keh chungchang te an sawiho a. He huna kalkhawm mi 70 te hnenah hian Indian Institute of Horticulture Research (IIHR) NEH hnuai atangin Tomato chi Arka Samrat leh Arka Abed sem chhuah a ni bawk.

Khawhai khua hian kum 2022 khan Tomato hi ching tanin chhungkua 54 in bul an tan a, kg 7070 an thar hman a ni.

Khawzawl District KVK te hian Rabung khuaa chhungkaw 70, Chawngtlai khuaa chhungkaw 40, Neihdawn khuaa chhungkaw 30 hnenah leh Ngaizawl khua a chhungkaw 10 hnenah heng tomato chi a pe chhuak bawk.