1532/2023-2024

Dated Siaha 16th August 2023: Vawiin khan Social Welfare & Tribal Affairs Minister, Working Committee on Ruihhlo Do Chairman ni bawk Er.Lalrinawma hovin 'District Level Task Force on Ruihhlo Do' chuan DC Mini Conference Room-ah thutkhawmna an nei a, Siaha District chhunga ruihhlo do na kawnga hmalakna hrang hrangte sawihona leh zirchianna an nei.

Minister chuan District Level Task Force on Ruihhlo Do member lo kawlkhawmte hnenah lawmthu sawiin, an hnathawh leh ram leh hnam tana an inpekna fakawm a tih thu a sawi a. Mizoram atanga ruihhlo umbo a nih theih nan sawrkarin theihtawp a chhuah tih tarlangin, ruihhlo do na tur hian sum cheng vaibelchhe 3 chu semchhuah tawh a ni, a ti. Sawrkar chauhin ruihhlo a do hneh thei lo tih sawiin Mizoram chhunga NGO hrang hrangte nen thawhhona thatak neih niin Task Force member-ah pawh ruat an nih thu a tarlang a ni. Ruihhlo Do hi thil awlsam tak a ni lo a, inpumpekna leh tanho ngai tak a ni a, thalaite ruihhlo laka an fihlim zel theih nan thawhhona tha a pawimawh takzet a ni, a ti.

Er. Lalrinawma chuan ruihhlo do kawngah hian tihtur hlawm lian tak tak - Supply Reduction, Demand Reduction, Harm Reduction leh Awerness - a awm thu sawiin, helamah hian theihtawp chhuah a beih zel a nih chuan ruihhlo do kawngah hlawhtlinna tha a awm thei dawn a ni, a ti bawk. Ruihhlo chu mimal maia do hneh theih a ni lo tih sawiin Er.Lalrinawma chuan mitin tanrual a ngai a,thawhhona tha tak a awm theih nan mitinin theihtawp chhuah a tul a ti bawk.

Siaha District chu Myanmar nena ramri nei a nih avangin nasa leh uar zawk a ruihhlo do pawh kalpui a tul hle tih sawiin, Task Force On Ruihhlo Do -te pawh tha thlah mai lova rim zawk a thawk turin a ngen a ni. Tun dinhmuna Siaha District Level Task Force On Ruihhlo Do-te hmalakna chu fakawm a tih thu tarlangin, ram leh hnam tana thawk an ni tih in hre reng turin a chah a. Thahnem ngaihluat avanga mi thenkhat sawiselna pawh an tawh ngei a rin thu sawiin, chutiang karah pawh rilru hnual mai lova rilru puitling tak pu chung a ram leh hnam tana thawk zel turin a sawm a ni.

Minister chuan ruihhlo do kawngah mipuiten tihtur pawimawh tak an nei tiin mahni kalchhuak thei kher lo mahse, ruihhlo do kawnga ke pen chhuakte chu theihtawp a lo tawiawm tur in a ngen a. Mipuite tel lo chuan ruihhlo do chu thil harsa tak a nih avangin mipuite tawiawmna tha a awm theihnan mipuite pawh ruihhlo do kawnga nasa zawk a penchhuak leh tan la turin a sawm a ni. Siaha District chhunga pawl hrang hrangte chu ruihhlo do na kawngah thawhpuiah sawmin Er.Lalrinawma chuan thalaite nun chhanhim tur leh thangthar lo awm leh zel tur, tu leh fate tan a chenna tlak leh chhenfakawm tak siam tur leh Ruihhlo Do kawnga bungthar kaipui turin Siaha mipuite chu a sawm nghal a ni.

Pu Lalhmunsanga Hnamte District Bawrhsap leh District Level Task Force on Ruihhlo Do Chairman ni bawk chuan Siaha District chhunga an hmalakna hrang hrang bakah hmachhawp an neihte tarlanna a nei a. Ruihhlo Do khuhhawnna chu 24th April 2023 khan neih niin Village Level Task Force din tura thuchhuah pawh VC tinte pek tawh niin tun dinhmunah Village Level Task Force chu VC 31 ah din tawh niin, din belh tura hmalak mek zel a ni, a ti. District Level Task Force On Ruihhlo Do Meeting thuchhuak angin 24×7 Information Desk siam niin Master Trainer pali ruat tawh ni bawkin heng Master Trainer- te hi Traning- a hma lama pe turin Director, SW&TA, Aizawl hnenah dilna thawn tawh a nih thu sawiin De-Addiction and Drug Treatment Centre pahnih- Agape Home (Zero point) leh Kalvari Healing Ministry (Siahatla) ah te 'spot verification' neih a nih tawh thu a tarlang bawk.

Siaha District Level Task Force on Ruihlo Do hi May ni 9, 2023 khan din a ni a. Chairman atan Deputy Commissioner niin Vice- Chairman hi Superintendent of Police niin President, MTP General Headquarters chu Member Secretary atan ruat a ni bawk. Member dangte chu - Chief Medical Officer, Assistant Commissioner, Excise & Narcotics, District Education Officer, District Social Welfare Officer, President MJA Siaha District, President MSO General Headquarters- te niin, President, MCHP General Headquarters - chu Co-opted member a ni bawk.