1531/2023-2024

Dated Aizawl, the 16^th August, 2023: Vawiin khan CM Conference Hall ah Chief Minister Pu Zoramthanga kaihhruaiin National Bamboo Missions in Asian Development Bank nena tangkawpa Northeast state panga heng Mizoram, Tripura, Meghalaya, Assam leh Nagaland a mau behchhan Industry te nasa taka tihchangtlun leh thawhho tir a tumna (Bamboo Value Chain Development in Northeast) Mizorama kalpui dan tur chungchang an sawiho.

He hunah hian Pu K. Lalthawmmawia, Commissioner & Secretary, Horticulture Department chuan National Bamboo Missions in Asian Development Bank sum hmanga hmalak a tum dan tlangpui leh Mizoram chhunga hmalakna tura State Bamboo Missions te mawhphurhna turte, department dang kaihhnawih awm thei ang chite leh thil pawimawh dangte a sawifiah hmasa a. Pu C.H Lalmuanpuia, Missions Director, Mizoram State bamboo Missions leh Horticulture Director ni bawk chuan hemi hmalakna atana ruahmanna an neih tawh chinte a sawifiah bawk.

Meeting hian, he hmalakna hi Mizoramin a tangkai thei ang bera a hman theih nan leh ram mipuiten hlawk taka an chhawr theih nan tuna Mau hmanga Industry kalpui mektute nena inrawnkhawmna neih leh phawt ni se, an ti a. Anni te nena hmalak ho theihte bakah hmalak theihna dang la awmte nen kimchang takin a rang lama Project thehluh ni se tiin a rel a ni.

Meeting-ah hian Dr. K. Pachhunga, MLA, Vice Chairman, Bamboo Development Board leh Dr. Renu Sharma, Chief Secretary bakah official pawimawh tak takte an tel a ni.