3930/2023-2024

Khawzawl, 22nd January 2024: Khawzawl Sub-Headquarters Young Mizo Association (YMA) chuan zanin khan Khawzawl Zuchhip Branch YMA Hall-ah Kumpuan hawnna hun an hmang a. Khawzawl Bawrhsap Pu K. Lalrohlua chuan khuallian niin he hun hi a hmanpui a, Kumpuan thupui ‘Ram leh Hnam Humhalh’ chu a hawng nghal a ni.

Khuallian Pu K. Lalrohlua chuan YMA Kumpuan thupui - ‘Ram leh Hnam Humhalh’ chu Kumpuan thupuiah vawi 14 hman a ni tawh a, YMA  General Conference 2023–a Biatea neih chuan ‘Ram leh Hnam Humhalh’ hi kumpuan thupuiah a thlang leh tih a tarlang a. Ram leh Hnam Humhalh chuan Kumpuan thupuia a lo hman tawh thin ‘Zirna Uar Kum’ , ‘Ramngaw Humhalh’, ‘Ruihhlo Do’ leh a dang te a huam tel vek a ni, a ti a. A thusawi bultan nan Ram Humhalh tih thupui then hmangin - Mizoram Remna in a hrinchhuah, state dang te neih ve loh Article 371G chu a ropui thu a sawi a. Mizoram chu dan tha bik hmanga hung bik, ram mipuite rem tihna lova thlak hnam tih phung te thlak danglam theih loh a ni chu a hlu hle a ni, a ti a. Khawvel changkanna kal zelah chak deuha ram leh hnam humhalh a nih loh chuan hnam lian zawk te chim ral a hlauhawm thu sawiin, kalkhawmte chu Mizoram humhalhna dan pawimawh ‘Inner Line Permit’ te zirchiang a hman tangkai tum turin a chah a ni.

Khawzawl Bawrhsap hian  Kumpuan hawnna huna kalkhawm - Sub Hqrs, Group leh Branch YMA hruaitute chu Kumpuan thupui an bawhzuina kawngah titha ber nih tum  theuh turin a chah a. Ram leh Hnam Humhalh tur chuan sumdawnna a dinchan a tul zia sawiin, hnamdang ten min luahlan lohna turin ram neitu ten hlep teuh i tum lo ang u, a ti a.  Khuallian hian zirna chu mi lian leh mi te ber te intluktlanga an khawsak theihna kawng, ram leh hnam humhalh theihna pawimawh tak a nih thu a sawi a. Khawzawl District-a a awm hnuah HSLC Exam Center neih belh a nih tawh thu te, HSLC 2023 result nei tha ber Khawzawl Vengthar PES leh pass percentage hniam ber Neihdawn HS te a tlawh tawh thu te tarlangin, Khawzawl District mi ngeiin Khawzawla dinhmun pawimawh an luah theih nan tun atanga tan la turin YMA hruaitute chu a sawm a ni.

Pu K. Lalrohlua chuan ramngaw leh nungcha te humhalh chu ‘Ram leh Hnam Humhalhna’ huang chhung a mi a nih thu sawiin, ramngaw leh nungcha te chu humhalh zel a tul a ni, a ti a. Ramngaw tichereu leh ramsa suat zawnga che te thuneitute hnena thlen hreh loh a tul, a ti bawk. Mizoramah Kohhran inkhawm a tam thu sawiin - Zing tawngtai inkhawm, nilai zan, inrinni zan leh Pathianni nileng te inkhawmna hun a awm a, heng te hi Kristian nun inchher hriamna hun a ni, Biakin pawnlamah Kristianna lanchhuah tir a pawimawh ber a ni, a ti. Ram leh Hnam Humhalh turin Isua Krista hnungzui a pawimawh ber a, mal tlat leh fianrial nuna Krista hnungzuitu nihna mitinin an lanchhuah tir a tul a ni, a ti bawk. Young Mizo Association chu Mizoram mipui ten ram leh hnam humhalh turin an ring tawk a, chuvangin Khawzawl Sub Hqrs YMA hnuaia Group YMA leh Branch YMA te chu kumpuan hawn tak tihlawhtlingtu nih tum theuh turin Bawrhsap hian sawm nghal a ni.

Kumpuan hawnna inkhawm hi Pu Vanlalsawma, Khawzawl Sub Headquarters YMA Vice President, Kumpuan Chairman ni bawk chuan a kaihruai a. Pu Saithangpuia, Sub Hqrs Executive Committee Memberin hunserh a hmang a; President Pu PC Rosiama’n lawmthu sawina a neih hnuah inkhawm hi tih tawp a ni.