No.2327/2021-2022

Aizawl the 24th September, 2021: Mizoram khaw chhak tlangdungin power an dawn kawnga harsatna awm thinte sutkian a nih theihna tura hmalakna kal mek zelah September ni 28, 2021 hian Pukpui, Serchhip atangin East Lungdar to Khawzawl 132 kV Line kaltlangin Khawzawl thleng power lakluh enchhinna test charge neih tum a ni a. Inpuahchahna kalpui mekah electric hruipui hnaih leh dinhmun hlauhawma awm thei a ngaih Sialhawk Dinthar Venga Pu Vanlalniliana In sak mek chu 132 kV Line a hnaih avangin vawiin chhun khan thiah a ni.

In sak mek hian 132 kV Line a hnaih lutuk avangin chhiatna thleng thei reng a ni tih Power & Electricity Department Khawzawl chuan Khawzawl DC hnenah an thlen a, report bawhzuiin Khawzawl District Disaster Management Authority chuan Disaster Management Act, 2005 tlawhchhanin In thiat turin thutlukna a siam ta a ni. In thiah sak tak Pu Vanlalniliana tanpui nan hian Pu K. Duhsanga Sr. EE, Khawzawl Power Division chuan tanpuina pawisafai a pek bakah, Khawzawl DC Office pawhin SDRF kaltlangin tanpuina pawisafai an pe a, Khawzawl DC aiawhin Pu James Lalnithanga, SDO (Sadar) chuan a hlan a ni.

Pu K. Duhsanga, Sr. EE, Khawzawl Power Division chuan September ni 28, 2021 hian East Lungdar-Khawzawl 132 kV Line test charge neih a ni dawn tih sawiin, a hlawhtlin theih chuan Khawzawl, Champhai leh Saitual District-te tan hmun hnih atangin power lakluhna a awm theih tawh dawn thu a sawi bawk.

Ni 28.9.2021 hian Khawzawl to E.Lungdar 132 kV line Test Charge a nih dawn avangin hemi hun chhung hian he line-in a kaltlang khua E.Lungdar, Biate, Sialhawk, Khawhai, Chalrang, Chawngtlai leh Khawzawl khaw mipute chu tower leh line hnaiha awm lo tur leh line khawih phak thing/mau kit lo turin Khawzawl Power Division chuan a ngenin a hriattir a. Hemi hun chhunga spark emaw thawm danglam hria an awm chuan SDO/JE (Phone No.9862382628/8731889015) te hnenah hriatir vat tur a ni ang. September ni 22, 2021 chawhnu khan E.Lungdar 132 kV Sub-station chu hlawhtling taka 132 kV level a test charge a lo ni tawh a, power transformer pawh commission nghal a ni bawk.

In thiahnaah hian Pu James Lalnithanga, SDO (Sadar), Pu K. Duhsanga, Sr. EE, Khawzawl Power Division, P&E thawktute, 2nd IR Bn, Khawzawl hnuaia State Disaster Response Force-te, Khawzawl DC Disaster Branch hnuaia Quick Response Team-te leh Sialhawk Advisory Board-in hnatlang a kohte an tel a ni.