No.2328/2021-2022

Aizawl, 24th September, 2021 : Vawiina Union Minister of Petroleum & Natural Gas, Hardeep Singh Puri hova “Investors’ Meet on Exploration & Production Opportunities in the North East” Guwahati-a neihah Commerce & Industries Minister Dr. R. Lalthangliana a tel.

He meetingah hian thusawina hun hmangin Minister Dr. R. Lalthangliana chuan Chief Minister Pu Zoramthanga’n a ngaih pawimawh em avangin a aiawh turin min tir a ni, a ti a. Mizoramah kum 2003 atang khan hydrocarbons zawn hna hi tan a ni tawh a, Oil & Natural Gas Corporation of India (ONGC) leh Oil India Limited (OIL) ten chan insemin hma an la a, Mizoram chu hmun kilkhawr leh tlangram kawn chep tak tak awmna hmun a nih avangin duh angin chet lak a harsa a, fur ruahtui tla a tam thin bawk nen Mizoram sawrkarin theihtawp chhuaha tan a lakpui chung pawhin an beisei angin hna a kal chak thei thin lova, hei vang hian hydrocarbons zawn hun tura sawrkar laipuiin hun a bituk pawh kum 2 a pawhsei tawh nimahse CVID-19 hripui leng a rawn thawk bawk nen, kum 4 dang tal hi chu a lo berah hun min pek belh a ngai a ni, a ti.

Commerce & Industries Minister chuan Mizoram chu India hmarchhak kila awm nimahse Myanmar leh Bangladesh nen international border thui tak kan intawm a, anni bakah kan chheh vel State te hi hydrocarbons nei tha an nih avangin Mizoramah pawh hian tam tak a awm ngei a rinawm a, Mizoram mai bakah hmarchhak State te hi a thu ringawtin min kalpui rei tawh a, a tak ram chang turin tan min lakpui a ngai a, sawrkar laipui pawhin tun aia awnze nei zawk hian min kalpui se kan duh hle a ni, a ti a. Kaladan Multi-Modal Transport Project (KMMTP) kan chhawr tangkai theih hunah phei chuan Mizoram hi hmun pawimawh takah a chan dawn avangin ngaihthah chi kan ni lo, a ti bawk.

Heng bakah hian Dr. R. Lalthangliana chuan India hmarchhak state te hian harsatna thuhmun kan hmachhawn hova, hengte hi min chinfel sak a tul a, DoNER Ministry pawisa a tulna a hman theih loha a awmte hi thil fello a ni a, hengte hi a rang lama chinfel a ngai a ni, a ti bawk.

Ministry of Petroleum & Natural Gas, Government of India hian Hydrocarbon Vision 2030 for north-east India thlir chungin “Investors’ Meet on Exploration & Production Opportunities in the North East” hi a buatsaih a ni.

Meeting karlakah hian Dr. R. Lalthangliana leh India hmarchhak state hrang hrang Minister-te inkawm khawmin harsatna an neihte leh thawhho dan turte an sawiho a ni.

He meet-ah hian Union Minister of State for Petroleum & Natural Gas, Rameswar Teli bakah India hmarchhak state hrangb hranga Minister te, Ministry of Petroleum & Natural Gas-a official pawimawhte leh Company lian pawimawh tak tak aiawhte an tel a ni.

Dr. R. Lalthangliana hian Mizorama hydrocarbons zawn hna thawk mektu ONGC leh OIL hotute chu nizan khan Mizoram House, Guwahati-ah kovin a titipui a, chak zawk leh nasa zawk a hma la tura hrilhin, a tul ang apiangah Mizoram Sawrkarin puih a inhuam thu a hrilh a. An hun tiam chhunga an thawh zawh hman loh te an thawh zawh ngei theihna tura hun tam zawk pek belh an nih theih na'n Ministry lamah hma a lak pui mek thu a hrilh bawk a ni.

Minister hi Pu Lalthazuala, Director, Geology & Mineral Resources-in a tawiawm a ni.