No.2329/2021-2022

Aizawl, the 24th September 2012 : Pachhunga University College (PUC) in Khawchuam (Adopted Village) atan Khawrihnim an thlang a, hemi puala programme vawiina Khawrihnim Community Hall a buatsaih chu School Education changtu Minister Pu Lalchhandama Ralte’n a hmanpui a ni.

Pu Lalchhandama Ralte chuan, Khawrihnimah hian zirna chu hmun sang tak, a lailumah in dah a, zirna in ngai pawimawh hle tih ka hriatin a lawmawm ka ti a. Kan zirtituten covid 19 avanga sikul kal theihloh lai pawha, sikul fai leh uluk taka an enkawl a ni hi a ropui ka ti a. Hei hian zirna in ngaih pawimawhzia a tilang a ni. Zirna dah pawimawh khua apiang hi an dingchhuak dawn a, PUC in adopted Village an an thlang hi a inhmeh hle a ni, a ti bawk.

Minister chuan PUC mithiam rualin a thlawna Khawrihnim an rawn zirchiang tur chu an vanneih thu a sawi a, an hmaa vanneihna chu bawhbelh lo turin a ngen bawk. A sawi zelnaah Pu Lalchhandama Ralte chuan, Pu Zoramthanga kaihhruai ministry chuan Education chu ngaihpawimawhah a nei a, hripui harsatna karah pawh zirtirtu indaihlohna chu a theih ang anga sukiangin, school building tha lo pawh thahnem tak thuam that a ni bawk tih a sawi a. Covid hripui karah pawh School Education department chuan a theih angin zirna a kalpui ngar ngar a, India ram state dangin Board Exam an buatsaih theihloh laiin keini chuan kan kalpui thei a. Hei hi hnathawktute nen kan thawhona that vang leh Education hi hmun pawimawha kan dah vanga ni, a ti bawk.

Minister hian Khawrihnim High School Choka sakna tur Rs. nuai khat (1 lakh) ape a, Middle School hnenah Computer set pein Primary School hnenah Special Trainner atangin zirtirtu pahnih a pek tur thu a sawi bawk. Hei bakah hian Khawrihnima khuaa zirna in hrang hrang tan infiamna hmanrua, football, volleyball leh net te a pe tel bawk a ni.

Hawnna inkhawmah hian Prof H. Lalthanzara, Principal, Pachhunga University College chuan thu sawiin, he adopted village hmang hian Khawrihnim khuain eng angin nge hma a sawn theih ang, engnge chaklohna leh hmasawnna tur a neih ang tih te zirchian a ni ang a. Chumi hmang chuan a ti theitu leh sorkarin hma alak theih dan tur kawng te ngaihtuah a ni zel dawna ni, a ti. Khawchuan hawnna atan hian YMA branch hnenah computer set leh printer a pe nghal bawk a ni.

PUC hian kum 2013 atang khan Adopted Village hi an kalpui tan a. Phulpui, Lungleng leh Dulte khuate chu Adopted Village ah an lo thlang tawh a. Kum 2021 a?ang hian Khawrihnim khua hi Adopted Village atan an thlang a ni.

PUC Adopted Village, Khawrihnim atanga HSLC a mark hmu sang ber Zodinpuii hnenah leh HSSLC a mark hmu sang ber Laldinliani hnenah chawimawina (Award), Tanka fai leh Certificate an hlan bawk a ni.

Adopted village hi PUC a zirtirtute pawisa thawhkhawm hmanga kalpui a ni a. Zirtirtu leh department ten anmahni thiamna zawn theuhah Khawrihnim khua hi an zirchiang dawn a ni.

Adopted Village hawnna inkhawm hi Pu C.Lalzuiliana, VCP chuan a kaihruai a. Dr. H. Laldinmawia, Village Adoption Committee chuan report pein, khawchuam kalpui dan tur tlangpui a sawi bawk. Pu Malsawmzual, YMA President chuan Khawrihnim chanchin tlangpui a sawi a. Dr.H.S Thapa chuan lawmthu sawiin hun hnung a khar a ni.

Adopted Village hawnna inkhawmah hian khawtlang hruaitute, sawrkar hnathawk leh PUC zirtirtu thenkhat an tel a ni.