No.2036/2021-2022
Aizawl, the 28th August, 2021: Tunhnai nihnih chhungin Khawzawl Town chhungah Covid-19 active case 9 (pakua) hmuhbelh niin, positive contact chhungkaw engemawzat khunghran mek an ni. Khawchhung dinhmun thlirin hrileng darh zel tur ven nan District Headquarters chhungah khauh zawka Covid-19 SOP te kenkawh tul ni a hriat a nih avangin Pu C.C Lalchhuangkima, Deputy Commissioner & Chairman, District Disaster Management Authority, Khawzawl District chuan vawiin August ni 28, 2021 atanga September ni 4, 2021 chhung hian Khawzawl Town huam chhungah Covid-19 No Tolerance Week kalpui a nih tur thu a chhuah.
Hemi hun chhung hian Zonal Officer, Police leh Executive Duty ten an bial chhung theuh ngun taka thlithlaiin an fang thin dawn a. Covid-19 hri leng laka himna tura Mizoram Sawrkar DM&R Department leh DC Office-in Covid-19 inkaihhruaina a tihchhuah zawm lote chu Section 5 of The Mizoram (Containment and prevention of the spread of Covid-19) Act, 2020' hmangin hremna pek zel an ni ang.
Khawzawl District Bawrhsap chuan Covid-19 hrileng laka him tura theihtawp chhuah chu mitinte mawhphurhna a nih thu tarlangin, himtlanna tura sawrkarin inkaihhruaina a siamte zawm theuh turin District mipuite ngenin a hriattir bawk.
Khawzawl District Bawrhsap chuan Covid-19 hripui dona kawnga YMA Sub-Headquarters, Khawzawl huam chhunga YMA Branch hrang hrangte hnathawh fakawm tiin, an huam chhunga Village Level Task Force-te theuh tha tichak tura a tul anga duty thin tur leh, Covid-19 kaihhnawih inzirtirna hrang hrangte uar zawka tlangau leh hmanraw dang kaltlanga puangchhuak thin turin a sawm nghal bawk a ni.
