1914/2023-2024

Khawzawl, 16th September 2023: Khawzawl Zaingen Branch YMA chuan vawiin khan an branch din champha kum 75-na ( Platinum Jubilee) chu Zaingen Branch YMA Hall-ah an hmang a. He hun hi Deputy CM Pu Tawnluia chuan khuallian niin a hman pui a, jubilee lungphun hawngin souvenir a tlangzarh nghal bawk.

Khuallian Pu Tawnluia chuan thu sawiin Khawzawl Zaingen Branch YMA hruaitu hmasate chu zahna chibai a buk a. YMA chu pawl lian tak, thalaite fuankhawmna, mizo hnam chawisanga, hnam thinlung, tihphung leh ziarang te vawng nunga venghimtu pawl ropui tak a ni, a ti a. Sawrkar tha tichak tura YMA hruaitu ten thurawn tha tak tak an pe thin leh an theihna zawna ke pen an inhuam thin chu lawmawm a tih thu a sawi. Zohnahthlak unau thenawm ram atanga lo lut te chu sawrkarin riltama an awm a phal lo a, theihtawp a chhuah zel thu pawh sawiin zohnahthlakte inpumkhatna leh inunauna kawnga YMA hnathawh chu a ropui hle a ni, a ti bawk.

Deputy CM chuan khawtlang hruaitute nen tangkawpin Zaingen hmun hlui chei thata humhalh a nih thu sawiin, Puchhuan lung atanga Thlanpui thleng motor kal theiha siam a nih thu a tarlang a. Rambuai vanga Khawzawl hmuna khaw hrang hrang khalh khawm an nih lai leh tun dinhmun khaikhina hmasawnna ropui tak hmuh theih a ni chu ropui a tih thu a sawi a. Hruaitu leh mipuite tanrualna chu jubilee hlim taka lawm theihna bul a ni, a ti.

Pu Tawnluia hian kalkhawmte chu mizo hnam chhanchhuahna, humhimna leh chawisanna kawngah theihtawp chhuah theuh turin a sawm a. Mizo nun ze mawi - tlawmngaihna, aia upa zah, thenawm khawvengte ngaihtuahna leh inhmangaihna ropui tak chu vawng nung zel turin a chah a. ‘YMA takin aw’ tih thu chu hawihhawmna, inthliarhranna awm lohna leh midang tana inpumpekna keng tel tawngkam a ni, a ti a. Jubilee lawm tura kalkhawmte chu he thu mawi tak hi vawng nung theuh tura fuihin khuallian hian hnam thinlung pu chunga hmasawnna hna thawhpuiah a sawm nghal a bawk ni.

Platinum Jubilee lawmna hunah hian Deputy CM  hian Zaingen Veng huamchhunga kum 75 chin te chu jubilee pualin cheng 1000 theuh a pe a ni.

Pu Fabian Lalfakawma, Central YMA Treasurer pawhin he hunah hian thu sawiin mahni ram leh hnam ngaisanga, ngaihlu leh dah sang thiam te chu khawvelin a zah thin a ni, a ti a. YMA chu pawl huapzo tak a nih thu a sawi. Zaingen khawtlangin YMA Platinum Jubilee an thleng chu a lawmpui thu sawiin, khawtlangin he hun pawimawh an ngai hlu chu lawmawm a tih thu a sawi bawk.

Khawzawl Zaingen Branch YMA hi September ni 16, 1948 khan Zaingen khua Thalthlithaw Veng Primary School-ah din a ni a. Tun dinhmunah member 447 awm mekin. Jubilee pual hian nimin (September ni 15) lam atangin hun hlimawm tak hman a ni a, vawiinah ruai nen ropui taka lawm a ni.

Vawiina Zaingen Branch Platinum Jubilee lawmna inkhawm hi hun hnihah then a ni a. Hun hmasa lam hi Organising Commitee Chairman, Pu B. Lalhlimpuia chuan kaihruaiin Jubilee dar vuakna hun hman a ni a. Hun hnihna hi Branch President Pu Joseph Vanlalnghaka’n a kaihruai a. Zaingen Lal Kaihranga fapa Pu Lalrengpuia Sailo chuan Pu K. Lalzika lehkhabu ziah ‘Zaingen khua leh a chhehvel’ tih chu chuan a tlangzarh a. Khawzawl Sub Headquarters YMA,  Lal Kaihranga thlahte leh khual atanga he hun hmang tura kal te hnen atangin thu sawi ngaihthlak a ni a. Hnam lam hmuhnawm tak tak leh zai ngaihnawm tak tak te ngaihthlak a ni bawk.