1913/2023-2024

Hnahthial the 16th September 2023: Kumin kumtawp lama Mizoram Legislative Assembly inthlanpui neih tur atan inbuatsaihna kalpui mek a ni a, Hnahthial District-a South Tuipui AC-ah pawh inbuatsaihna hi chak taka kalpui niin vawiin khan Pu Neng Thianlala, Electoral Registration Officer (ERO), SDO (Sadar) ni bawk chuan Hnahthial khawpui chhung Polling Station hrang hrang te tan Electoral Roll Hearing of Claims & Objections a nei a, ERO hi Booth Level Officer (BLO) ten an tawiawm a ni.

Electoral Roll Hearing a neihnaah hian Pu Neng Thianlala, ERO chuan Electoral Roll a lut thar kum 18 tling tharte chu an document a felfai chuan koh an nih loh thu a sawi a, paih leh belh ngai, document felfai tak neite pawh koh tel an ni lo, a ti. ERO chuan tuna kohte chu chu roll-a inziak lut tawh, document felfai lo te, polling station insawn duh te an nih thu a tarlang bawk. Electoral Roll Hearing of Claims and Objections hi karleh lamah pawh neih chhunzawm tura ruahman a ni a, Assistant Electoral Registration Officer (AERO), SDC ni bawk Pi Betty Lalrinfeli nen hearing hi Polling Station hrang hrang ah kalchilhin an neihpui dawn ani.

Tun dinhmunah Hnahthial khawpui chhungah Polling Station 6 a awm mek a, vote nei mi 5830 awm mekin, mipa 2831 leh hmeichhia 2999 an awm mek tih Mizoram State Election Commission chuan an tarlang a ni.