541/2025-2026

Khawzawl, dated 10th May 2025: Vawiin chawhma dar 10 khan Zaingen YMA Hall-ah Zaingen Village Council chuan Zaingena HSLC leh HSSLC pass tharte tan lawmpuina hun leh infuihna hun (career guidance) a buatsaih a, Khawzawl Bawrhsap Pu K. Vanlalthiana, Khawzawl SP Pu F. Lalbiakzauva leh Assistant Professor Pu Lalruatpuia te chuan resource person niin he hun hi an hmanpui.

Resource person te chuan HSLC leh HSSLC pass tharte tan fuihna leh inhrilhhriatna thuchah an sawi a, an kal zelnaa kawng awm thei te, hna thawh theih hrang hrang te, hlawhtling tur chuan taimakna leh tumruhna a ngaih thu te leh an tawnhriat thenkhat te an sawi. Khawzawl Bawrhsap Pu K. Vanlalthiana chuan district tihmingthatu leh chawimawitu an nih avangin lawmthu a hrilh a, an kal zelna turah duhsakna hlanin district tana theihtawp chhuah zel turin a fuih a ni.

He hun hi Zaingen VCP Pu HP. Lalduhawma'n a kaihruai a, pass lawmpuina hun hi Zaingen VC Treasurer Pu Laldinsanga'n kaihruaiin pass tharte hnenah thilpek hlan a ni. District Education Officer Pu JR Lalhruaitluanga, MUP leh MHIP aiawh te'n thu an sawi bawk a, hun khar nan VC Member Pu K. Lalchhanchhuaha'n lawmthu sawina hun a hmang a ni.

He hunah hian zirlai naupang leh khawtlang mipui te, tlawmngai pawl hrang hrang te leh department thenkhat an tel a ni.