540/2025-2026

Aizawl, the 10th May 2025: Vawiin hi Assamese te Kut pui ber, Rongali Bihu a ni a. He hun hi Mizoramah pawh Assamese te chuan Berawtlang Multipurpose Cultural Complex-ah an lawm a. Speaker Pu Lalbiakzama pawh, Khuallian atan sawm a nih angin a tel a ni.

Speaker Pu Lalbiakzama chuan Mizoramah Rongali Bihu lawmnaah Assamese unau te Khuallian atan an sawm chu a ngaihlu tih a sawi a. Mizorama Assamese unau te chu he Kut pual hian duhsakna chibai a buk a ni.

Speaker chuan Hmarchhak unau pasarih te inlungrualna inpumkhatna atan Assam State chu an pawimawh tih sawi a. Rongali Bihu chu  Assamese te tana kumthar  lawmna, buhseng lawmna hun  leh inpumkhatna kut a ni a. He hun lawmawm kaltlangin hian Assamese unaute pawh Hmarchhak unau pasarih te inpumkhatna atan hmahruaitu ni turin a sawm a ni.

Speaker chuan Mizoramah chuan Kut pawimawh pathum -Chapchar Kut, Mim Kut leh Pawl Kut te ropui takin kan lawm thin tih a sawi a. Bihu leh Chapchar Kut phei chu Agriculture lam kaihhnawih a ni a, a hun dang hret mahse a inzul thawkhat nia a hriat thu te a sawi a. Mizoramin Kutpui kan lawmna hunah te Assamese unaute leh Hmarchhak unaute chu rawn kut ve thin turin a sawm a. Assam State chu India Hmarchhak tan Agriculture a hmahruaitu an nihnaah lawmpuiin Hmarchhak that Buhzem ni chhunzawm zel turin duhsakna a hlan nghal bawk a ni.

Rongali Bihu hi Bohag Bihu tih nen a thuhmun reng a. He hun hi Assamese te tan chuan an buhseng hun a ni thin a, kum bul chhiar tanna atan an hmang bawk a ni.

He Kut lawmna hunah hian Vice-Chancellor of Mizoram University, Prof. Dibakar Deka, Prof. Pranab Chandra Kalita, President, Assam Cultural Society, Dr. Firdoos Jaman, General Secretary, Assam Cultural Society,Prof. Kalyan Sarma, President, Rongali Bihu Celebration Committee-2025, leh Pu Bikram Kumar Das, Chairman-Rongali Bihu Celebration Committee-2025 & Finance Secretary, Assam Cultural Society te chu a puipate an ni a. Rongali Bihu celebration puala Programah hian kut chhimtu te chuan item hrang hrang neiin hun hlimawm tak an hmang a ni.

Khuallian thusawi kimchang : https://dipr.mizoram.gov.in/post/speech-of-honble-speaker-on-the-occasion-of-celebration-of-rangoli-bihu-2025-at-multipurpose-cultural-complex-at-beraw-tlang-on-the-10th-may-2025