No.2646/2021-2022

Aizawl, the 19th October, 2021: Covid-19 hrileng laka him nan leh hri inkaichhawng zel tur chhut chah a nih theih nana sawrkar hmalakna, mitinte hmaituamna hmang uar tura inzirtirna 'All Mask Campaign' chu ngawrh lehzuala Khawzawl District-a hman turin vawiin chawhma dar 11 khan District Hospital, Khawzawlah hawn a ni. He hunah hian Pu C.C. Lalchhuangkima, District Bawrhsap chu khuallian niin All Mask Campaign, Khawzawl District chu a hawng a ni.

District Bawrhsap Pu C.C. Lalchhuangkima chuan Health Minister-in District hrang hrang thuneitute virtual meeting a neihpui bawhzui nan Khawzawl District-ah ngawrh lehzuala hmaituamna vuah uar tura inzirtirna 'All Mask Campaign' beihpui thlak tan a nih thu sawiin, Mizorama Covid-19 case la san chhan chu hmaituamna vuah that tawk loh vang a ni thui hle niin mithiamten an sawi thu a tarlang a. Khawzawl District chhungah hri danna Covid-19 vaccine dose khatna la tawh za zela 90 (90%) leh a bikima la tawh za zela 75 (75%) an awm tlin tawh thu a sawi bawk.

Khuallian chuan All Mask Campaign hman hun chhungin mitinte hmaituamna tha taka hmang tur leh inchhungkhura kum upa leh natna benvawn chenpui neite phei chu inchhungah pawh mask vuah ngaipawimawha a tul tawpah lo chuan phelh hauh lo turin a chah bawk. A khuhhawn nan Bawrhsap chuan  VLTF te hnenah hmaituamna pack khat theuh a sem nghal bawk a ni.

He hun kaihruaitu Dr. Lalnunpuii Renthlei, Medical Officer, District Hospital Khawzawl  chuan mipuite chu hrileng laka him nana inkaihhruaina siamte tha taka zawm turin a chah a. All Mask Campaign chu Khawzawl District chhungah tun thla chhung ngawrh taka kalpui tum a nih thu a sawi bawk. 

He hunah hian All Mask Campaign thuchah chu kalkhawmte hian zau takin an sawiho nghal a. Hmalakna tur zingah District Level Task Force on Covid-19 atanga All Mask Campaign chungchanga ngenna thu chhuah siam te, Campaign hi naupangte pawhin an hriat thiam ve theih nan Cartoon hmanga zirtirna media hmanga thehdarh te, slogan point pali te banner hmanga kawtthler hrang hranga tar te, Medical Officer-te kaltlanga All Mask Campaign chungchang Talk Show neih chungchangte bakah Khawzawla Daily Newspaper pahnihah campaign chhung zawngin hmaituamna hman uar inzirtirna slogan pali te chanchinbu kaltlanga chhuah tura ruahmanna siam ni se tih a ni bawk.

Hmaituamna hman uar inzirtirna All Mask Campaign, Khawzawl District hawnna hunah hian Pu James Lalnithanga, SDO (Sadar), H&FW Department thawktute,  Khawzawl Town chhunga VLTF hruaitute, NGO hruaitute leh media mite an tel a ni.