No.2645/2021-2022

Aizawl, 19th October, 2021:  Law & Judicial Minister Pu T.J. Lalnuntluanga, Champhai South bialtu MLA ni bawk chuan tukin khan Champhai Kanan veng Aizawl road kama lei che thin chu Official leh khawtlang hruaitute hruaia tlawhin hmalak zel dan tur a enfiah.

Khawtlang hruaitute atanga rawtna thlente bakah veng chhung inkalpawhna kawng remchang zawk a awm theih nana ruahmanna siam, lei chetna hmun tantlanga  Aizawl Road atanga Taitesena Section, Kanan Veng panna ke kawng siam lailawk chu hmalakna lian zawk nghah a nih chhung atana hman theih turin khawl hmang lovin, mihring tha hmangin zal nuam deuha tihlen hret nise tih a ni a. Lei chet vel dante pawh thlithlai reng a tul thu pawh tarlan niin, VC te chu tui luankawr tha leh fai taka vawng chhunzawm reng tura chah an ni.

Minister chuan Kanan veng lei che leh Lersia Field Ruantlang lei che a hmalak chungchangah hna lian leh daih rei tur ni lem lo hmanga hmalak ai chuan project lian leh tlo tham tur law law siam vat a nih theih nana hmala thuai turin PWD hotute a hrilh a, a tul angte lo buaipui turin District administration pawh a chah nghal bawk. State Disaster Response Fund hmanga tih theih bakahte central atanga hmalak dan turte pawh buaipui zel a tul dawn avangin chak taka hma la turin a chah nghal bawk a ni.

Law & Judicial Minister-in Kanan veng lei chetna hmun a enfiahnaah hian Pu Henry C.Lalrawnkima, Addl. DC; Pu Eddie C. Zothansanga, EE, PWD; Pi R.Lalnunkimi, DUDO; Dr. Lallawmkima DIPRO leh khawtlang hruaitute an tel a ni.

Pu T.J. Lalnuntluanga hian tukin vek khan Tuipui khua a tlawh a, tukthuan eikhamah Aizawl panin a let leh a ni. 

Attachment

  • Loading attachment...