No.83/2021-2022

Dated Khawzawl, the 10th April, 2021: Nimin chawhnu khan Pu Zothanmawia, Deputy Commissioner, Khawzawl District kaihhruaiin DC Conference Hall-ah district chhunga dan leh thupek kaihhnawih ngaihtuaha thutkhawm a ni.

He hunah hian Superintendent of Police, 2nd IR Battalion, District Village Council Association, Sub-Headquarters YMA aiawhte leh DC office a officer-te telin, lungrual takin a hnuai a mi ang hian hmalakna tur rel a ni:

1. Phalna nei lova kuhvarah, ruihhlo leh dan phal loh thil dang Khawzawl District chhunga lo lut thinte chu lo dan a, tihtawp a nih theih nan hmalak nise. Heng smuggling thil phurtu motor in a paltlang khua-a Village Council leh YMA/VDP te pawh sawrkar thuneitute thawhpui a, smuggling kaihhnawih dan bawhchhiatnaah chuan thuneitute hnena report pe vat thin tura beisei an ni.

2. Phalna la hmasa lova sumdawng leh pawl thenkhatin District chhunga kawng thar an lai leh, kawng hlui chei tha a, dan phal loh thil chi hrang hrang phurh nan an hmang thin chu titawp turin hmalak nise, a tul chuan kawng laihna hmanrua (JCB, Motor) te pawh mansak thin nise.

3. Ruihhlo (zu leh drugs) chu chhungkua leh khawtlanga harsatna hrang hrang thlentu a nih avangin lungrual tak leh theihtawp chhuaha do chhunzawm nise.

4. Khawzawl District chhunga khua/veng engemawzatah Village Defence Party (VDP) din a ni tawh a. Sawrkar duhdan a nih angin VDP la din lohna khua/vengah te din vek nise.

5. India ram state hrang hrangah Covid-19 second wave a thleng mek chu Khawzawl District-ah pawh lo thleng ve thei reng a nih avangin mitin fimkhur a ngai a. District puma hman turin Covid-19 chungchanga inkaihhruaina (SOP) tihchhuah nise. District huamchhunga Village Council/YMA ten an khua/veng ah theuh tlangau hmanga puangzar turin hriattir ni bawk se.