No.84/2021-2022

Aizawl, 10th April 2021 : Nimin April 9 khan Mizoram Lok Sabha MP Pu C.Lalrosanga chuan Berawtlang, Aizawla Laithangpuii College of Pharmacy Graduation Ceremony hmanpuiin, Pharmacy Diploma pass thar mi 50 te zinga titha zual mi 3 hnenah chawmawina a hlan.

Pu Lalrosanga chuan Mizorama Pharmacy College awm chhun aṭanga zirchhuak thar te chu a lawmpuina leh duhsakna hlanin sorkar hna ah an lut emaw emaw, zirna an chhunzawm emaw, damdawi dawr hawnga ei an zawng a nih pawhin anmahni dawrtute laka an mawhphurhna hre reng tur leh damdawi ei dan dik leh a hnathawh dan te hrilhfiah peih turin a chah a. Mizorama damdawi hman thiamna leh hman ṭangkaina awmze nei tak an thlen ngei a beisei thu a sawi.

Laithangpuii College of Pharmacy hi kum nga vel kal ta a Mission Foundation Movement in an din leh Pharmacy Council of India in a hriatpui zirna a ni a. State dang aṭanga zirlai eng emaw zat an awm a ni.

Pass chhuak tharte hnenah Khual Zahawm Pu R.Rodingliana,Mizoram Govt Pharmacists' Association President chuan Certificate a hlan a. Mission Foundation Movement Director Upa Dr. R Vanlalzauva'n lawmthu sawi pahin, harsatna tam tak karah Pharmacy lama Mizoram mamawh phuhru tura hma an lak dan a sawi a. He College a zirlaite chu Pathian thu nena kaihruaiin, Principal leh zirtirtuten zirna standard sang thei ang bera an zirtir ṭhin thu te, Pharmacy zir theihna seat 60 phalsak an nih thu leh pass chhuak ten  damdawi in hrang hranga training an neih zui theihna tur ruahmannate siam a ni tih a sawi.