Vawiin chawhma khan Khawzawl District Bawrhsap Pu H. Lianzela, MCS kaihhruaiin DC Conference Hall-ah Chapchar Kut 2020  hman dan tur rel a ni. 

Bawrhsap chuan  Chapchar Kut ropui tak  Mizo hnam ziarang  pho lang thei zawng leh  mipui tan pawha hlawk thlak thei tur zawnga  huaihawt a tul thu a sawi a. He hunah hian Working Committee din nghal niin, Chairman atan DC Pu H. Lianzela ruat a ni a. Co-Chairman atan Jt. YMA President leh  Jt. VC Chairman Khawzawl-te ruat an ni a, Secretary atan Group YMA President, Asst. Secretary atan DFO (Wildlife)  te bakah Finance Manager atan mi pahnih BDO leh  MHIP Sub Hqrs President-te ruat an ni a.  NGO leh sawrkar department hotute atangin mi 9 ruat an ni bawk.

 Meeting chuan Chapchar Kut  lawmna  chu March Ni 6 ah Field No 1,  Zuchhip vengah hman ni se, Mizo zirang lang thei turin Khawzawl khawpui chhung YMA branch-tin ten mahni pualin  Cultural  Hut feet 8x12 aia te lova sak ni se tiin a rel a. YMA branch hrang hrangte chu sawrkar department hrang hrangte nen thawk hovin department   hmalakna Chapchar Kutah hian   phochhuak ni se tih bakah  Cultural Hut-ah hian Mizo hnam zia rang pholang thei Mizo hmanrua chi hrang hrang te, Mizo kut chhuak ei leh in tur chi hrang hrangte pholan ni se tih a ni.

 Chapchar Kut lawmnaah hian  Branch hrang hrang YMA chhang te a rualin cheraw kan tura besei an ni a,  MHIP branch hrang hrang te chu Parlam leh Siktuithiang lam entir tura beisei an ni bawk a.  Heng bakah hian district chhung khaw hrang hrang atanga entir tur sawm nise tih leh Kut lawmna huna tel turte chu   Mizo thuama inchei ni se tih a ni bawk.