He hun kaihruaitu District Bawrhsap Pu K. Lalrohlua chuan Civil Services Day chu kum 1947 April ni 21-a India ram Home Minister hmasa ber Sardar Vallabhbhai Patel-a’n Administrative Services Officer, probationer-te hmaa a thusawi hriat rengna ni a nih thu leh kum 2006 atanga hman tan a nih thu a tarlang a. Khawzawl District-ah a tumkhat nan Civil Services Day, 2023 hman a ni chu lawmawm a tih thu sawiin, he Day hman chhan hi Sawrkar hnathawkte'n inhlanna, inpek tharna nena ram leh hnam tana ke an penna tur a ni, a ti. 

District bawrhsap chuan Khawzawl chu Mizoram khawpui fai ber lawmman dawngtu a nih angin kawtthler leh tui luankawr te, veng kil khawr tak thlenga a fai thu te leh lawmman dawng tlak nia  a hriat thu sawiin, sorkar hnathawk te, zirna in lama thawkte leh mipuite thawh rah a ni a, a tak takin a fai a ni, a ti a. Khawzawl district chu district lian tak ni lo mah se lansarhna a ngah a, khaw taima tak tak  an tama Tualte khua chu tomato thar chhuah leh hralh chhuah kawngah a hmingtha a, Sialhawk khua Lakhuihthei thar chhuah leh hralh kawngah hriat hlawh tak niin, Biate khua chu faina kawngah leh Thingpuife thar chhuah kawngah a lar a, Vankal khua pawh Solar Park avangin khaw hriat hlawh a ni tiin, lawmawm a tih thu a sawi a. Khawzawl khuaa WhatsApp group-ah te inhnial buaina leh tawngkam mawi lo leh hmuh nuam lo a awm lo chu chhawmnun zel tlak nia a hriat thu a sawi bawk.

District Bawrhsap chuan mipui ngheng department-te chu tawngkam mawi leh thlum hman kawnga hmasawn zel tur leh tan la thar zel turin a chah a. Sawrkar hnathawkte chu mahni hlawh hmuhna atan chauh a thawk lova, mahni awmna hmun apianga rilu thar nena mipui tana thil tangkai tur hlawhtlinna lang tham neih ngei tum thin tura a chah bakah Sawrkar hnathawkte chu politics thilah tawngkam hmang fimkhur fo thin tur te, sawrkar ta an nih anga eng party sawrkar hnuaiah pawh rinawm taka hnathawk thin tur turin a chah a. Inhlanna thar nen an hnaah inpe thar a, Khawzawl District tan an hna theuhah penkhat tala hmasawn tura inbuatsaih turin a chah a ni.

He hunah hian SDO Sadar Pu Vabeimozachhi Chozah in Good Governance chungchang a sawifiah a. DHO Khawzawl Pu Lalnunpuia'n Tualte khuain Tomato an thar chhuah dan leh hralh chhuah kawnga hmalak dante bakah, Sialhawkin Lakhuihthei an thar chhuah dan leh hralh chhuah kawnga hmalak dante a tarlang a. UD&PA Inspector Pu B.Lalhmangaihtluanga'n Mizoram Cleanliness Competition (Notified Town) 2022 a Khawzawlin pakhatna a lak chungchanga inpuahchahna leh hmalak dante a tarlang bawk.