185/2023-2024
Ṭau thla ni 21, 2023: Vawiin khan Civil Services Day 2023 chu Lawngtlai DC Conference Hall-ah Lawngtlai Bawrhsap Pu David Lalthantluanga hovin Lawngtlai DC office-a officer-te leh staff-te'n an hmang.

Pu David Lalthantluanga chuan sawrkar hna thawkte hian mipui tana thawk kan ni tih kan inhriat chian a, hlawh hmuh nan maia thawk lo va, an rawng kan bawlsak mipuite tana inpekna thuk zawk nena hna thawk tura inhlan thar fo a pawimawh a ni, a ti a. Sawrkar hna thawk kal khawmte chu an hna thawh chhan hre chiang tur te, mipui tana dawr nuam tak nih tum tur leh anmahni dawrtute ṭanpui tura inhawng reng turin a chah a. Ram hmasawnna chak zawka a kal theih nan sawrkar department hrang hrangte thawh hona ṭha a pawimawh thu a sawi bawk.

Civil Services Day hi India ramin zalenna a hmuh hnua Home Minister hmasa ber Sardar Vallabhbhai Patel-a'n Administrative Services Officer-te hmaa Delhi Metcalf Hall-a thu a sawi ni April ni 21, 1947 beh chhanin kum 2006 aṭang khan hman ṭan a ni a. Mipuite rawngbawl tura sawrkar hna thawkte inhlan tharna ni atan hman ṭhin a ni.