No.7567/2020-2021

Khawzawl District Deputy Commissioner & Chairman, District Level Task Force on Covid-19 Pu Zothanmawia thupek bawhzuiin, Covid-19 chungchanga sawrkar thuchhuah hrang hrangte zawm a ni em tih Khawzawl chhunga veng hrang hrangah Zonal Officer, VLTF leh Police te'n Thawhlehni February Ni 16 atanga vawiin February Ni 19, 2021 thleng khan sawi lawk lovin endikna an nei.

Hetianga hrilh lawkna awm lova endik thutnaah hian dawr leh sumdawnna hmuna dawrtute chinchang hriatna tura Sulhnu app/Register vawn leh hand sanitizer chhawpte, mipui phur lirthei khalhtute, infiamna hmunte, restaurant leh thingpui dawr bakah, mipui vantlangin mask vuah tura thupek an zawm tha em tihte endik nghal zel a ni.

Endikna atang hian dawrkai leh sumdawng thenkhat, register a phone number leh address dah mumal lo an awm tih hmuhchhuah niin, a pawimawhzia inhrilhfiahin uluk lehzuala vawng chhunzawm tura hriattir nghal zel an ni a. Sawrkar thupek zawm lo mi thenkhatte chu dan anga pawisa chawitir an ni bawk.

Hrilh lawk lova endikna kalpui thin hi District Hqtrs. huamchhung Khawzawlah a khat tawkin neih thin a ni dawn a. Thawktute leh mipui inlungrualna leh thawhhona that avanga Covid-19 hri leng mekin Mizoramah ziaawm lam a pan chho zel ni a a lan karah he hrileng hi a darh zel lohna turin mipuite chu inthlahdah lova, kan himna tura sawrkarin inkaihhruaina hrang hrang a tihchhuahte zawm zel turin District Level Task Force on Covid-19, Khawzawl District chuan mipuite a chah a ni.