3708/2022-2023

Khawzawl, the 28th February, 2023: UD&PA Department Khawzawl buatsaih DAY-NULM Festival cum Street Food Festival 2023, February ni 28 atanga March ni 2, 2023 thleng awh tur chu vawiin chawhma dar 11 khan Volleyball Court, Khawzawl Dinthar-ah District Bawrhsap Pu C.C. Lalchhuangkima'n a duh apiangte tlawh leh dawr theih turin a hawng.

Khuallian Pu C.C. Lalchhuangkima chuan Khawzawla DAY-NULM Festival buatsaih a nih theihna tura UD&PA leh DAY-NULM hnuaia thawktute fakawm a tih thu a sawi a. DAY-NULM kaltlangin khawpuia mirethei leh harsa zawkte chawikang turin sawrkarin ruahhmanna hrang hrang a siam thin thu a sawi a. DAY-NULM kut hnu leh sulhnu hrang hrang hmuh tur a awm chu lawmawm a tih thu sawiin, ram changkang ni tura beihna kawngah mipa ringawt ni lovin hmeichhiate pawh an tel ve a tul a ni tih hriain, central sawrkar chuan DAY-NULM hnuaiah Self Help Group-te dinin a chhawmdawl thin a ni, a ti bawk.

DAY-NULM kaltlanga nuhote hmalakna chhuanawm a tih thu sawiin, bawlhhlawh atanga thil mawi leh tangkai tak tak siamte chu entawntlak a tih thu a sawi a. Kalkhawmte chu program ti hlawhtlingtu leh scheme hmalaknate puangzartu nih tum turin a fuih a. Scheme pawimawh tak tak kaltlanga hmeichhiate hmasawnna hmuh theiha a awm chu lawmawm a tih thu pawh sawiin, theihtawp chhuah chhunzawm zel turin a chah a. DAY-NULM Festival hman chuan hamthatna dawngtuteah chona nasa zawk siam se a duh thu a sawi a; hmasawnna leh hlawkna chhimtu zawng zawng ten an chan theih nan duhsakna a hlan a ni.

He hun hi Pu K.Lalramnghaka, SDS, UD&PA Department, Khawzawl chuan a kaihruai a. DAY-NULM, Khawzawl City Mission Manager Pi Lalrinngheti'n DAY-NULM kaltlanga hmalaknate a sawifiah a. Pu David C.Lalawmpuia, Urban Surveyor, UD&PA Department-in lawmthu sawiin hun hman hi a khar a ni.

Khawzawla DAY-NULM Festival cum Street Food Festival buatsaihah hian Stall hrang hrang 32 siam niin, DAY-NULM hnuaia beneficiary ten an thil siam leh thiam dehchhuahte dawr theih turin an pho chhuak a ni.