1046/2026-2027 

Dated Khawzawl, the 17th June, 2026: Vawiin khan Khawzawl District Consultative Committee, District Level Review Committee leh District Level Security Committee for quarter ended March 2026 chu an Chairman, Bawrhsap Pu K. Vanlalthiana kaihhruaiin DC Conference Hall-ah an thukhawm.

Chairman Pu K. Vanlalthiana chuan member kalkhawmte chu an rawngbawlsak mipuite hre reng chunga hna thawk zel turin a fuih a. Bank-te chu mipuite abikin thingtlang mite khaichhuah nan leh eizawnna kawnga hma an sawn theih nan tanpuia hma lak pui zel turin a chah bawk.

Vawiin thutkhawmah hian Lead Bank Manager Pu Lawmkima chuan agenda sawizauna a nei a. January – March, 2026 (4th Quarter, 2025–2026) chhunga Khawzawl District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni.

He hunah hian bank sum vawn himna (security) lam leh pawisa leng vel (currency management & remittance) chungchang sawi ho a ni a. January – March 2026 chhung khan Khawzawl mipuite zingah sawrkarin social security scheme a ruahman PMSBY-ah mi 2275, PMJJBY-ah mi 1522 leh APY-ah mi 225 an inziaklut a. Inziaklut tam zawk an awm theih nan ṭan lak lehzual ni se, tih a ni a. Bank, Lead Bank leh CFL kaltlangin mipui hnenah sum hman leh enkawl dan inzirtirna (Financial Literacy Campaign) ṭum 27 buatsaih niin mi 1058-in an chhim tih tarlan a ni a. FLC hi ṭha taka kalpui chhunzawm zel turin bank-te'n ṭan la tlang se tih a ni bawk.

Bank-a mipuiin sum an dah luh (deposit) zat za zela bank-in mipui hnena sum an puktir (credit) zat chhutna, Credit/Deposit Ratio (CD Ratio)-ah March Quarter 2026 chhungin CD Ratio 80.41% an nei a, Mizoram district zawng zawng zingah Khawzawl district chu a ti tha ber pathumna a ni.

He hunah hian kum 2026–2027 sawrkar kum chhunga Khawzawl District chhunga bank-te'n loan an pek chhuah dan tur ruahmanna, Annual Credit Plan (ACP) chu Chairman Pu K. Vanlalthiana chuan a tlangzarh nghal a. Sum pek chhuah tura tinzawn chu Priority Sector Agriculture-ah loan cheng nuai 8631.88, Priority Sector MSME-ah loan cheng nuai 2079.01, Other Priority Sector Loan-ah cheng nuai 2485.66 leh Non-Priority Sector-ah loan cheng nuai 2733, a zavaia belh khawmin loan cheng nuai 15,929.55 a ni.

Vawiin hunah hian SDO, Line Department, RBI, NABARD, Lead Bank hotute bakah Khawzawl district chhunga bank hrang hrang aiawhte an tel a ni.