3477/2023-2024

Khawzawl, 24rd January : Vawiin khan Khawzawl District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Khawzawl District Bawrhsap Pu K. Lalrohlua hovin Khawzawl DC Meeting Hall-ah an ṭhu khawm.

Chairman Pu K. Lalrohlua chuan member kalkhawmte inlawmna thu sawiin, Khawzawl District hmasawnna atana thawhpui zelah a sawm a . Bawrhsap hian National Bank for Agriculture Development (NABARD) ten Khawzawl District chhunga mipui khawsak chawikan nan a sum (loan) an pek chhuah dan tur tarlanna document ‘Potential Linked Credit Plan’ chu he hunah hian a tlangzarh a ni.

He hunah hian meeting hmasa September ni 25, 2023 a DCC meeting minute chu pawm a ni a. Kum 2023 Financial Year chhunga Khawzawl District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

Vawiin meeting hian Khawzawl District chhunga Bank te chu venhimna kawnga an dinhmun te zirchian ni se tiin a rel a. Hemi agenda ah hian Khawzawl SP Office chu Bank tinah CCTV vuah a ni em tih te, Log Book tha taka vawn a ni em tih te, Fire Extinguisher a awm em tih te bakah venhimna kenkawh chungchanga thil pawimawh dang te bank tinah a awm ngei tih fiah turin mawhphurhna pek a n ni.

Meeting-ah hian Khawzawl District chhunga Bank ten sum an vawn dan (Currency Management) chungchang te, sawrkar laipuiin mipuite hamthatna atana a duan Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY) leh Atal Pension Yojana (APY) chungchang te sawiho a ni a. Khawzawl District chhunga Bank ten mipui sum dahluh (deposit) atanga sum an puk chhuah tir zat Cash Deposit Ratio thlirhona te neih a ni a; Bank ten Kisan Credit Card (KCC), Agriculture, Housing Loan, Education Loan, Pradhan Mantri Employment Generation Programme (PMEGP), Pradhan Mantri MUDRA Yojana (PMMY), Self Help Group (SHG) Credit Linkage, National Urban Livelihood Missions hnuaia Self Employment Programme an kalpui dan te thlirho a ni bawk.

National Bank for Agricultural Development buatsaih kum 2024-25 chhunga Potential Linked Credit Plan ah hian Khawzawl District chhunga Agriculture, Micro Small & Medium Enterprise (MSME), Education, Housing leh hmasawnna ruhrel tihhmasawn nan cheng nuai 7024.51 dah a nih thu tarlan a ni.

Meeting-ah hian Khawzawl District Consultative Committee member te, RBI aiawh , Bank hrang hrang aiawh bakah  tlawmngai pawl hruaitute leh kuthnathawktute aiawh (AMFU) te an tel.