3478/2023-2024

Aizawl 24.01.2024: New Delhi a cham mek Pu F. Rodingliana, Minister of State for Power & Electricity Department, Commerce and Industries Department leh Printing & Stationery Department chuan nimin (23.01.2024) chawhma dar 11:30 khan Pu Md. Mustafizur Rahman, Bangladesh High Commissioner chu Bangladesh Embassy, New Delhi ah hmu in, Mizoram leh Bangladesh insumdawn tawnna chungchang a sawipui.

Commerce & Industries Minister Pu F. Rodingliana hian Bangladesh High Commissioner hnenah hian kum 2022-ah Mizoram leh Bangladesh insumdawn tawnna tur inremna ziah tawh a nih laiin a tawn tawnah infrastructure mumal buatsaih anih loh avangin tun thlengin insumdawn tawnna mumal zawk a la kalpui theihloh thu a hrilh a. A hmasa berah inkalpawhna tha - khawmual leh lui tui chunga siam chu pawimawh hmasa a tih thu High Commissioner hi hrilhin, Mizoram lam chuan tun sorkar tharah pawh inkalpawhna kawng siam tur hian hma an lak mek thu sawiin, Bangladesh lam pawhin he ruahmanna milpui a hma an lak ve a duh thu Pu Md Mustafizur Rahman hnenah hian a thlen a ni.

Bangladesh High Commissioner hian Minister thusawi hi a tawmpui thu sawiin, Mizoram leh Bangladesh insumdawn tawnna tura ruahmanna awmsate tihlawhtling turin Central Sorkar a Ministry of External Affairs lam an pawimawh thu sawiin, nasa lehzuala nawr chet tlan a pawimawh thu Minister hi a lo hrilh a. Mizoram thlai tharchhuah zingah Sawhthing leh Aieng te chu Bangladesh-ah mamawhna a sang hle a ni tih lo sawiin, Mizoram leh Bangladesh inkalpawhna tur lai hi hmun chhengchhia leh remlo lai a nih thin avangin tunhma in hmalak a har thin a, technology leh finna lo thang zelah tunah chuan thil harsa a awm tawh lova, tihpuitlin thuai a beisei thu sawiin a theih anga Bangladesh lamah pawh hma a lo lak tur thu Minister hi a lo hrilh a ni. Pu Md. Mustafizur Rahman, Bangladesh High Commissioner hi Mizoram lo zin a chak thu sawiin, Pu Maro-a hian Chapchar Kut hmang turin a sawm nghal a ni.

He ian inkawmna ah hian Bangladesh Sorkar lam atangin Dr. AKM Atigul Haque, Minister (Commercial) pawh telin Mizoram Minister hi Pu V. Malsawmtluanga, MLA & Vice Chairman, Lunglei High Powered Committee leh Pu Alexander V. Chongthu, Additional Resident Commissioner, Mizoram House, New Delhi ten an tawiawm a ni.