393/2025-2026

Khawzawl, dated 30th April 2025: Vawiin chawhma dar 10:30 khan Khawzawl Police Station-ah District Child Protection Unit, Khawzawl District bultumin Capacity Building and Training Programme for Special Juvenile Police Unit (SJPU) leh police personnel te tan buatsaih a ni a, Khawzawl DC Pu K. Vanlalthiana chu khuallian a ni. 

Khuallian Pu K. Vanlalthiana chuan Naupang dan anga venhim leh enkawl hi a pawimawh em em a, hursualna thleng leh mai thin te pawh inngaidam mai lovin a thlenna tur hmunah Police te kuta dah a pawimawh zia a sawi. Mahni hmelhriat chhung leh thiante thlengin lo khawih duh mai te hi an awm thin a, hetiang alo thlen hian dan anga hma lak hi naupang dikna chanvo humhalhna pakhat a ni tih hriat tlan a tul thu a sawi a. He training hi police leh SJPU te'n an hlawkpui ngei a beisei thu a sawi a, DCPU hnenah he hun pawimawh tak an buatsaih avangin lawmthu a sawi a ni.

He hun hi Dy. SP Pu Vanlalzawma'n a kaihruai a, First session-ah hian Khawzawl SP Pu F. Lalbiakzauva, Pu Vanlalruata JMFC, Champhai leh District Child Protection Officer Pi Lalsiammawii ten thu an sawi a ni. Second session-ah hian DCPU Legal cum Probation officer Pi R. Lalhmangaihsangi chuan Roles of SJPU tih thupui hmangin thu a sawi a, Protection Officer (IC) Pi C.Lalhmingsangi'n Dealing of CNCP and JCL cases tih thupui hmangin zirtirna a pe bawk. Sawihona hun tha tak hman a nih hnuin SDPO Pu C.Vaninmawia chuan lawmthu sawinain hun a khar a ni.

He hunah hian Police hnena naupang case lut apiang engtianga lo hma lo lak a buaipui tur nge tih te, naupangin dan angin a dikna chanvo a hmu ngei em tih te, Police in Child Protection te nena an thawhho ngaihna lai te inhrilh tharnan hun hman a ni. Case ziahdan leh case kalpui dan tlangpui inzirtirna neih a ni bawk. He hunah Police te an tel tha hle a, training hlawkthlak tak neih a ni.