392/2025-2026

Dated Aizawl: the 30th April 2025 :  Vawiin chawhma dar 10:00 khan Animal Husbandary & Veterinary Department chuan Polyclinic Conference Hall, Aizawlah State puma scheme leh project hrang hrang Department hnuaia kalpui mekte thlirletna, 'State Level Review Meeting' leh A.H&Vety. Department hnuaia Hand holding Scheme kaihhnawiha mipuite leh Department-te langtlang zawka an thawhho theihna tur 'Hand holding Portal' tlangzarhna hun an hmang a. He hun hi A.H&Vety. Department changtu Minister Pu C. Lalsawivunga chuan khuallian niin a hmanpui a, portal hi a tlangzarh nghal a ni.

Khuallian A.H& Vety. Minister Pu C. Lalsawivunga chuan A.H&Vety. Department hnuaia thawhhona tha tak awm chu entawntlak a tih thu sawiin, Vety. Officer kalkhawmte chu inpekna leh thahnemngaihna nena thawk zel turin a fuih a, tih tak takna chu hlawhtling tura pawimawh a ni, a ti a. Department hnuaia scheme leh project hrang hrangte chu uluk taka zirchian a pawimawh tih sawiin, hemi atana pawimawh tak hmalaknate thlirletna 'Review Meeting' buatsaih chu hlawkpui thei ang bera hmang turin kalkhawmte a chah a. Sawrkarin scheme leh project tha tak tak a duante chu rawng an bawlsak mipuite tana tangkai a ni tih hre thar leh theuh tura chahin, taima taka zir chiang hmasa thin turin a fuih a. Scheme leh project kaihhnawiha hman tur portal hawn a ni ta chu lawmawm a tih thu a sawi bawk.

Review Meeting hi Dr. Lalrozama, Commissioner & Secretary, A.H & Vety. Department chuan kaihruaiin, kalkhawmte lawmna thu a sawi a. Scheme leh project hrang hrang chungchanga hmalak dante PowerPoint Presentation kaltlanga thlir ho niin, chawhnu lamah sawi hona hun hlawkthlak tak hman zui a ni a. Dr. R. Zothanmawii, Director, A.H & Vety. Departmetn chuan lawmthu sawiin hun hnan hi a khar a ni.

He hunah hian A.H&Vety. Department hnuaia officer-te an kal kim thawkhat hle a ni.