391/2025-2026

Champhai, 30th April 2025: Vawiin khan Champhai District Narco Coordination Centre Committee (NCORD)chu DC Conference Hall, Keifangtlangah an ṭhukhawm a. Bawrhsap Pu Mohammad Aaquib chuan he hun hi a kaihruai a, District chhunga ruihhlo do kawnga hmalakna hrang hrang te thlirho a ni.

Ṭhutkhawm kaihruaitu Pu Mohammad Aaquib chuan Champhai District chu ramri hrula awm anih angin ruihhlo do kawngah tha thlah lo a ṭan mar reng a ṭul tih a sawi a. NCORD member-te chu an theihna zawn ṭheuhah theihtawp chhuah turin a ngen a, thawhhona ṭha tak vawng nung reng turin a chah bawk a ni. Champhai Bawrhsap chuan ruihhlo do beihpui kal zelah ‘Ruihhlo Do Basketball Tournament’ buatsaih anih thu leh Walkathon leh Cycling Tournament buatsaih tuma hmalak mek anih thu a tarlang bawk.

Vawiin ṭhutkhawma tarlan danin, April thla chhung khan Champhai Police te chuan ruihhlo kaihhnawih case 9 ziak lutin, he mi kaihhnawihah hian mi 19 an man a. An hnen aṭang hian Heroin kg 1.875 leh Methamphetamine kg 12.282, cheng vaibelchhe 2.41 (₹2,41,91,600) man hu an man a ni. Champhai Police te hian Ruantlang, Zokhawthar leh Dungtlangah te Awareness Campaign an nei bawk. He mi hun chhung vek hian Excise & Narcotics Department te chuan ruihhlo kaihhnawih case 6 ziak lutin, mi 9 an man a, an hnen aṭang hian Heroin gram 809, cheng nuai 24.27 (₹ 2,427,000) man hu an man a ni. Assam Rifles lam pawhin ruihhlo kaihhnawihah ṭum 18 zet an che chhuak tih an tarlang bawk.

Vawiin NCORD meeting-ah hian ruihhlo dona kawnga thawktu ten an hmalakna leh harsatna hrang hrang an tawh te an sawiho a, sawrkar department leh tlawmngai pawl inkara thawhhona ṭha a awm zel theih dan tur pawh sawiho a ni bawk.

NCORD meeting-ah hian Champhai SP Pu Shivendu Bhushan bakah CMO, I&PR, School Education, Food & Drugs Administration, Excise & Narcotics, Assam Rifles leh Sub-Headquarters YMA te an tel a ni.