No.2126/2021-2022

Aizawl, the 4th September, 2021: September ni 2, 2021 (Ningani) atanga Khawzawl District Headquarters-a Covid-19 Mass Testing kalpui chu vawiin lamah pawh chhunzawm zel niin, Mass testing neihna hmunte hi Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District chuan a hmunah tlawhin a enpui a, Covid-19 positive natna langchhuak lo leh langchhuak nasa lote enkawlna tura ruahman Community Covid Care Centre (4C) thenkhatte pawh a tlawh nghal bawk. Bawrhsap hi Pu H. Lalramenga, SDC chuan a tawiawm a ni.

Khawzawl District Headquarters hi September ni 1, 2021 zan dar 7:00 atang khan hmun khuahkhirh bik 'Restricted Area' a puan niin, Covid-19 hrileng dinhmun dik tak hriat a nih theih nan a tuk September ni 2, 2021 atangin Mass testing neih nghal a ni a. Vawiin bikah hian Khawzawl Town chhunga veng pathum- Zaingen Veng, Zuchhip Veng leh Arro Veng-ahte Mass testing hi kalpui niin, sample 1,021 test atangin Covid-19 positive 2 (pahnih) hmuhchhuah an ni.

Dr. Lalnunpuii Renthlei, Medical Officer (Ayush) i/c Covid-19, Khawzawl District Hospital-in a tarlan danin Khawzawl Town chhunga Covid-19 Mass testing kalpui mekah Ningani atanga vawiin thlenga sample test tawh zawng zawng chu 2,964 niin, Covid-19 positive 8 (pariat) hmuhchhuah an ni a. Mass Testing hi karleh lamah chhunzawm tura ruahman niin, District chhung khaw dangahte pawh a tul dan ang zela Covid-19 Mass testing kalpui tum a ni.

Vawiin vek khan Pu Lalrohlua, Additional Deputy Commissioner, Khawzawl District chuan District chhunga Covid-19 active case awmna khaw thenkhat - Chawngtlai,  Khawhai, Sialhawk leh Biate khuate tlawhin Village Level Task Force-te nen an inkawm a, Covid-19 hrileng meka an dinhmun leh hmalak tawh dante bakah, hmalak zel dan turte a sawipui a ni.

Vawiin chawhnu dar 4:00 thlenga Khawzawl District-a Covid-19 case hmuhchhuah tawh zawng zawng chu 263 a ni a, heng zinga mi 119 te chu dam taka chhuak tawhin, tun dinhmunah Covid-19 hrikai enkawl mek 144 an awm a ni.