No.2125/2021-2022

Aizawl, 4^th September, 2021 : Vawiin chhun khan Human Resources Development Board Vice Chairman Pu L.Thangmawia'n Book Cafe, Chanmari, Aizawl-ah Mizo tawng lehkhabu thar 'Mizo Tawng Ri Ziarang', Dr Laltleipuii, Asst Professor, ICFAI University ziah a tlangzarh.

Tlangzarhna inkhawmah hian Pu L. Thangmawia chuan Mizo tawng zirna kawnga tangkai tak tur lehkhabu thar a lo chhuak chu lawmawm a tih thu a sawi a, he lehkhabu thar hian Mizo tawng hmasawnna kawngah mel lung thar Zofate min phunsak a ni, a ti. UNESCO in kum 2016 a tawng ral mai thei a tihchhuahte zingah Mizo Tawng a tel thu sawiin, tan lak theihna hrang hrangah Mizo tawng tih hmasawn nan ke kan pen a tul a, Chief Minister zahawm tak Pu Zoramthanga thupek angin Mizoram sawrkar chuan MIZO LANGUAGE BOARD din turin chak takin hma a la mek a ni tiin kum thar 2022 Assembly Session hmasa bera he bill put luh a nih theih nan Human Resources Development Board chuan chak takin  hma a la mek a, Mizo Language Board din a nih theih chuan Mizo tawng humhalh bakah tih hmasawnna kawngah a tangkai hle dawn a ni a ti bawk.

He lehkhabu tlangzarhna hun, sawm bik mi tlemte telna hi Pu Lalrammawia Ngente, Associate Professor, Govt Johnson College chuan kaihruaiin inlawmna thu a sawi a. Pu Lalzarzova, Asst Professor, MZU Mizo Department chuan lehkhabu thlirlawkna  (Book preview) hun hmangin he lehkhabu ziaktu Dr Laltleipuii chuan Mizo tawng hmasawn nan Linguistic lamah tan lak a tul thu a sawi a, tuna Mizo tawng chungchanga kan inhnialna tam tak hi linguistic atangin  chinfel theih a ni tiin lehkhabu chhuah a nih theih nana puitu zawng zawngte chungah lawmthu a sawi bawk.

He hunah hi Mizo Academy of Letters (MAL) Secretary Prof Rualkhuma Colney leh Mizo Writers' Association (MWA) President Pu R.Lallianzuala ten hmanpuiin pawl aiawhin  thu an sawi bawk a ni.