No.2124/2021-2022

Aizawl, 4^th September, 2021 : Vawiin chawhnu khan Health Minister Dr. R. Lalthangliana hovin SAD Conference Hall, MINECO-ah Health Department hotuten COVID-19 hrileng dona kawnga hma an lak dan an thlirho a, Health Secretary Pu R. Lalramnghaka bakah Health Department hotu pawimawhte an tel a ni.

Vawiin meetingah hian COVID-19 hripui leng dona atana thawktute mamawh hmanrua leh damdawi dinhmun a that thu tarlan a ni a, PPE kit bik chu nitin 400 vel hmang ral anga chawhrual niin tunah hian ni 4 chhung daih chiah a awm tawh a, Commerce & Industries hmalaknain tualchhunga PPE thui engemawzat hmuh belh thuai a nih dawn vangin athlaphanawm loh a ngaih a ni. N95 mask pawh nitin 400 vel hman ral anga chawhrual niin tunah hian thla 2 daih a la awm a, 3-layer mask hi nitin 700 vel hman ral niin thla 10 daih a la awm a, kutkawr (gloves) hi nitin 920 vel hman ral niin thla 9 daih a la awm a, hand sanitizer hi ni 100 daih la awmin Sodium Hypochloride pawh thla 1 daih a la awm a ni.

Viral Transport Medium (VTM) hi nitin 1500 vel hman anga chawhrual niin  thla 6 daih a la awm a, Rapid Antigen test kit hi nitin 12000 hman ral anga chhutin thla 1 daih a la awm bawk a ni. Rotary Club kaltlangin oxygen concentrator engemawzat dawn a nih tur thu tarlan a ni bawk.

Thawktu indaihlohna, a bik takin specialist daktawrah a manganthlak thu meetingah hian tarlan a ni a, an hlawh tur ruahman sa vek pawh ni mahse a thawk thei tur qualified daktawr an awm meuh loh avangin a buaithlak hle tih tarlan a ni.

Dedicated COVID Hospital-Zoram Medical College tawt lutuk chhawk zangkhai tura ruahman khum 50 awmna MRB DCHC, MINECO leh khum 40 awmna Kulikawn Hospital DCHC chu a khat deuh reng tih tarlan niin, a mamawhtu tak ten enkawlna tha an chan theih nan DCHC ah hian  symptom nei nasa te tih loh chu admit loh nise an duh thu leh COVID-19 positive te pawhin hei hi hrethiam se an duh thu tarlan a ni a, ZMC chu August thla laihawl vela an ziaawm viau hnuah tunhnai kar hnih chhung vel atangin damlo admit an pung nasal eh hle a, COVID ward leh ICU pawh an khat leh deuh reng tawh tih tarlan a ni bawk.

ZMC a hman tur CPWD in oxygen plant 1000LPM an siam mek chu zawhfel thawkhat tawh niin, oxygen plant dang 300LPM pawh oxygen pipeline final check nei turin phai lama engineer te chah mek an ni a, COVID-19 hri kaite enkawlna atana hman damdawi pawh tunah chuan an nei khawl tha rih a ni. August thla chhung khan ZMC-ah COVID-19 vanga nunna chan mi 53 an awm a, September ni 1 – 4 inkar, vawiin chhun thleng khan mi 5 in nunna an chan tawh a ni. August thla chhunga ZMC-a nunna chan zingah hian vaccine first dose la mi 12 leh full dose la mi 12 awmin, vaccine la miah lo mi 29 an awm a, vaccine la nunna chante hi natna dang khirh tak nei sa, damlo na tak takte an ni tih tarlan a ni.

Hrisel tha tak tak, insawiselna nei miah lo nunna chan an awm nual tawh tih ZMC hotute chuan sawiin, hei hi a chhan nib era lang chu COVID-19 hi virus thar a nih vangin kan taksaa raldotute hian an la hmelhriat loh avangin lo beih dan tawk tur an hre thin lova, mitinin he virus kan dolet dan hi a in ang lo thin a, mi thenkhatah chuan nasal eh lutuk tak maia he virus hi taksa raldo khawl ten an lo beih avangin taksa peng pawimawh dang (vital organs) ten a tawrh phah thin a, hei hi mi thenkhat chuan an tuar zo lo thin a ni, an ti a ni.

Health department hotute thukhawm chuan COVID-19 hri in nasa takin mipuite rilru leh ngaihtuahna a nghawng a ni tih sawiin hri kai leh hri kailo zingah pawh COVID-19 vanga rilru lama harsatna neite chuan inthlahrung hauh lovin mental health specialist te be thin turin an ngen a, District tinah heng mithiamte hi an awm vek a ni tih an sawi a ni.

Home Isolationa awmte zingah inkaihhruaina dan siam zawm that loh vanga chhungkuaa hri inkaichhawng an tam tih sawi niin, home isolation awmte chuan chhungkuain sawrkarin inkaihhruaina dan a siamte zawm tha hram hram turin an ngen a ni.

COVID-19 third wave lo thleng thei chungchangah Sawrkar inpuahchah dan report ngaihthlak a ni a, District tinah Child-friendly COVID Care Centre siam turin chak taka hma lak reng an ih thu tarlan niin uar zawka inzirtirna (awareness campaign) kalpui turin ruahmanna kalpui a nih thu leh sawrkar laipui atanga tih tur an rawn tukte pawh chak taka bawhzui zel a nih thu tarlan a ni.

Vaccine dinhmun a that thu tarlan a ni a, Identity Card nei lote tan thawhlehni leh ningani apiangin Dawrpui Multipurpose Hall-ah leh Bawngkawn South YMA Hall-ah vaccine hi a lak theih thu tarlan a ni bawk.

Sample Test runpui (Mass Test) hi State IDSP hmalaknain July ni 20 atang khan khua/veng 79 ah neih tawh niin, sample 1,02,397 test zingah COVID-19 positive mi 3074 hmuhchhuah an ni tawh a, a tul angin sample test runpui hi kalpui chhunzawm zel tum a ni.

Kum 18 hnuailam zingah hetiang hi kumin chhunga COVID-19 hri kai an pun dan a ni : April – 263, May – 1460, June – 2135, July – 5624, August – 6724, September 1-3 – 661.